Nongstoiñ, Risaw 12
Ki pulit ka West Khasi Hills kila pyntip ba la register mukotduma ha kaba ïadei bad ka durkhih (video) kaba la saphriang ha ki rynsan social media, bad ka jingtohkit halor kane ka kam ka dang ïaid mynta.
Ka khubor na u Superintendent of Police (SP) ka West Khasi Hills la ong ba ïa kane ka mukotduma la register ha thanad Mawshynrut katkum ka Case No. 19(10)2026 U/s 64(2)(m)/35 1(3) BNS R/w Section 5(1)/6/15 POCSO Act R/w Sec 67 B IT Act.
U SP u la ong ruh ba halor kane ka jingjia, na ka liang ki pulit ka West Khasi Hills ki la maham ïa ki paidbah ba kim dei ban pynsaphriang ïa kane ka video ha ki social media bad ki la kyntu ruh ïa baroh ki riew shimet ba ki dei ban weng noh mardor ïa ka video lada kila buh ne pynsaphriang.
Ki pulit ki la pynpaw ba ka jingpynsaphriang ïa kum kine ki video ka lah ban long kum ka kam runar katkum ka Bharatiya Nyaya Sanhita bad ka Information Technology Act, bad ba ki riew shimet kiba donkti ha kaba ïasam ne phah ne pynsaphriang ïa ka video kin shah pynngat ha ka aiñ.
Ki pulit ki la pynksan shuh shuh ïa ka jingdonkam ban ïada ïa ka jinglong jingman jong u lane ka lanot da kaba maham ba ka jingpynpaw ïa ka jingithuh jong ki lanot, ka long kaba lah ban pynshitom katkum ka aiñ.
Nangta, ka khubor ka kyntu ruh ïa ki nongshong shnong ba kim dei ban pynphriang ïa ki jingtip ki bym pat lah ban pynshisha ne ban sam ïa ka video, namar ka jingleh kumta ka lah ban pynmong shuh ïa ki lanot bad pynthut ïa ka jingtohkit kaba dang ïaid shakhmat.
Shuh shuh ki pulit ki la kyrpad ïa kino-kino kiba don jingtip ha kaba ïadei bad kane ka jingjia ba kin phone sha ka Police Control Room ha u number 9366498499 lane dial 112. Na ka liang jong ki pulit kila pynthikna ba ïa ka jingithuh ïa ki nongpyntip yn buh rieh.
Na ka liang u SP ha ka khubor u la ong ruh ba yn sa leh da kaba tyngeh pyrshah ïa u/ki nongleh kam sniew bad ki kyrpad ïa ki paidbah ba kin ai ka jingïatreilang bad ka jingtohkit bad kiar na kaba pynsaphriang ïa ki jingthoh ne video ba sngewkhia ha ki social media.
