Khliehriat, Risaw 12
Ki pulit ka East Jaiñtia Hills ha ka 12 tarik Risaw ki la ïoh ban bat noh ïa kawei ka kali kit nongpang (ambulance) bad ïoh ban kurup ïa u drok heroin uba shongdor haduh T.1.5 klur hadien ka jingpynlong ïa ka jingtalasi kali ha Damcherra, Kuliang, East Jaiñtia Hills District.
Ha kane ka jingjia ki pulit ki la kem noh ïa ki saw ngut ki briew kiba don hapoh kane ka ambulance kiba dei na Assam.
U Superintendent of Police ka District, u Shailendra Bamaniya lyngba u kyrwoh u la ong hadien ba ki la ïoh ïa ka jingtip ba thikna halor ka jingdon jong ki nongkhaïi drok kiba wan na Assam, kumta ki la pynlong ka jingpynap shrip ha Damcherra, bad ha ka por kumba 1 baje mynstep ki la ïoh ban bat noh ïa kawei ka ambulance kaba dei ka Maruti Ecco kaba don ïa u registration number ML13-B-1459 kaba wan na ka thaiñ Silchar da ka jingthmu ban hiar sha Guwahati.
Haba pynlong ïa ka jingtalasi, ki pulit ki la ïoh ban kurup noh haduh 27 tylli ki synduk sabon ba la thep ïa u drok heroin uba khia kumba 409.89-gram bad uba shongdor haduh kumba T.1.5 klur.
U SP u la ong ba ki pulit ki la kem noh ïa ki saw ngut ki briew kiba don hapoh kane ka kali ïa kiba la tip kyrteng kum u Alom Hussain Laskar, Nazim Uddin Burbhuiya, Mahir Hussain Mazumdar bad u Hashina Mamata Choudhury kiba dei na Silchar, Assam.
Ïa kine ki saw ngut la register case hapoh thanad Lumshnong hapoh ka kyndon jong ka NDPS Act. Ka jingtohkit mynta ka la ïaid shakhmat ban lapdien shuh shuh ïa kiwei pat kiba donkti ha kane ka kam.
