Shillong, Risaw 12
Ka Commissionerate of Food Safety, Meghalaya ka la bthah ïa baroh ki Food Business Operator (FBO) ha ka Jylla ba ki dei beit ban pyni lane buh ïa u ‘FSSAI Licence’/’Registration Number’ uba 14 dak ha baroh ki kot ki sla kiba ïadei bad ki nongthied-nongpet, kynthup ïa ki ‘cash-receipt’, ki ‘invoice’, ki ‘cash memo’ bad ha ki ‘Menu’ jong ki (Physical & Digital).
Katei ka hukum, kaba la pynmih da u Commissioner (Food Safety), Dr. Joram Beda, IAS, ha ka Lah Sngi U Blei, ka wanrah hapoh ka jingpeit jong ka ïa ki jaka pynmih marbam, ki jaka pynmih dud bad doh, ki jaka bam, ki ‘Hotel’, ki tyndur shet jingbam, ki nongdie marbam, ki nongsam marbam, ki dukan die marbam bad wat ki ‘Self Help Group’ kiba don bynta ha ka kam pynmih jingbam.
Kane ka sienjam ka kdew ïa ka jingbthah jong ka FSSAI kaba la pynmih ha ka 13 tarik u Nailur, 2022 bad ka jingbthah jong ka Central Consumer Protection Authority (CCPA) hapoh jong ka Consumer Protection Act, 2019.
Na ka liang ka Commissionerate, ka la kdew ba ka jingbuhrieh ïa u laisen nombar ka long kum ka jingpynkheiñ ïa ka ‘Food Safety and Standards (Licensing and Registration) Regulations, 2011’ bad lah ban shim kum ka “jingkhaïi ka bym leh hok” katkum ka kyndon 2(47) jong ka ‘Consumer Protection Act’, naba ka knieh noh na ki nongthied marbam ïa ki lad ki lynti ban pyntikna ïa ka jingbit-jingbiang jong ki nongpynbiang bam.
Ka tnad ka la kren shai ruh ba kan ym pdiang ïa ki laisen nombar ba shu thoh da ka kti ha ki ‘bill’ ba la shon. La bthah ïa ki FBO ba kin shon ïa u nombar ha ka ‘software’ siew ‘Bill’ jong ki khnang ban pyntikna ba ki long kiba shai bad kiba lah ban pule.
Shuh shuh la ai por 30 sngi ban pyndep ïa kane ka kam naduh ka tarik ba la ïoh pdiang ïa ka hukum. Ka jingbym kohnguh ïa kane, na ka liang u Commissioner u la maham, kan khring ïa ka jingpynshitom katkum ka aiñ hapoh jong ka ‘Food Safety and Standards Act, 2006’.
