Shillong, Risaw 12
Ka tnad pulit jong ka East Khasi Hills District kan pynthikna ïa ka jingpahara kaba khlaiñ ha baroh ki jaka ban pynthikna ïa ka jinglehniam Durga Puja kaba suk ba saiñ bad kaba lait na ki jingkulmar ha kylleng ka nongbah Shillong la ong u Superintendent of Police Bah Vivek Syiem.
Haba kren sha ki nongthoh khubor u Bah Vivek u la ong ba ka tnad ka la pynkhreh ïa ki pulit pahara na ka bynta ban pynthikna ban pynlong ïa ka jingpahara kaba khlaiñ ha man la ki jaka ba don ka jing-lehniam.
U la ong ba ka jingpynkhreh ka dang ïaid ban pynthikna haduh katno ngut ki pulit ba donkam. “Ïa mynta, ngim pat dep kheiñ haduh katno ngut ki pulit ngin donkam. Ngi dang ïakheiñ mynta, ngi dang don sa katto katne por. Ngi la pan shuh-shuh ïa ki bor pulit bad ngin sa shong bishar ïa ka jinglong jingman na ka por sha ka por” u la ong.
Haba ïadei ka jingpynkhreh, u Bah Vivek u la pyntip ba ïa ki pulit la pynbeit ba kin wan na kylleng ka Jylla, nalor ki CRPF kiba la don lypa, kumjuh ruh ki Sector Officer ki la ïa lum ïa ka jingïalang bad ki kynhun ba don bynta ba yn lah ban pynïaid beit ïaid ryntih ïa kane ka jinglehniam. U pyntip ba la dep pynmih ruh ïa ka jingbthah ban pyndait ïa ki kor CCTV bad ki lad jingïada na kino-kino ki jingjia, haba pynpaw haba ïadei ka jingtehlakam ïa ki jingjia kum ka jingjah ki khynnah bad ki Accident. U la ong ba la bthah ruh ïa ki Puja Committee ba kin buh ïa ki Volunteer, ki ban ïarap lang ïa ki pulit ka Shillong Traffic ha ki ‘pandal’ kiba heh bad ha ki jaka kiba kongsan, u la bynrap.
