Shillong, Risaw 12
Ka Voice of the People Party (VPP) State Youth Wing ha ka 12 tarik Risaw, 2026, ka la leit ban synranlang ïa ki nongdie madan kiba die jingdie ha lynti ïaid kjat ha Jail Road, ban kynduh ïa u Bah Sniawbhalang Dhar, Myntri ba dei khmih ïa ka tnad Urban Affairs bad kumjuh ruh ïa u PK Boro, Director ka tnad Urban Affairs, ban ïakren halor kiba die madan kiba ju shong die jingdie ha katei ka jaka.
Haba kren sha ki lad pathai khubor, u Samla Nathaniel Mawrie, General Secretary, u la ong ba na ka liang u Myntri um pat lah ban ai kano-kano ka jingkular kaba thikna, namar ba un hap ban ïashong pyrkhat shuwa bad ki ophisar.
Ka jingleit kynduh ka VPP ïa u Myntri, kadei hadien ba la mih ka jingïakynad kaba jur bha jong ki pulit bad kiba die madan, namar ka jingbym ailad ban shongdie jingdie ha katei ka jaka, u la ong.
“Ka party haduh mynta kam pat ïoh jingshai bha, halor ka jingkyndang noh ïa kiba die madan. Katkum ka jingïakren jong ngi bad kiba die madan ha Jail Road ki la ïathuh ba ki don kiba ïadie jingdie lang ha katei ka jaka, kim shym pat ïoh ïa ka CoV. Te ma ki ruh ki ong, ba ynda la ïoh lut ki CoV, kin sa ïa mih ryngkat,” la bynrap u Samla Nathaniel.
Nalorkata, u la ong ruh ba na ka liang u Director um don jingtip ei-ei halor kane, namar ba un hap ban ap ïa ka hukum na ki bor ba halor.
