Shillong, Risaw 13
Ka tnad Housing jong ka Sorkar Jylla ha ka 7 tarik mynta u bnai, ka la shong ïa ka jingïalang bishar bniah ïa ki kam ba la pynlong ha State Convention Centre, Shillong hapoh ka jingpynïaid jong u Myntri ka tnad Housing u Marcuise N Marak.
Ha kane ka jingïalang la ïashim bynta lang da u Secretary ka tnad Housing Bah BS Sohliya, u Joint Secretary LC Marak, u Director ka tnad Bah AS Mukhim, u Executive Engineer ka Directorate of Housing Bah MS Kharmalki, ki nongtrei ka Directorate, ki District Housing Officer, Housing Inspectors, technical staff bad kiwei-kiwei.
Ha ka jingïalang, u Director Bah AS Mukhim u la ai ïa ka jingïathuh bniah halor ki kam jong ka tnad, da kaba pynpaw ïa ka jingïaid shaphrang jong ki projek bad ki skhim bapher-bapher, ka jinglong jingman jong ka jingpyntreikam, ki jingeh kiba dang sahteng bad ki jingeh kiba ïakynduh.
Katba na ka liang jong u Myntri ha ka jingkren u la ban jur ïa ka jingdonkam ban pynkloi ïa ki kam kiba dang sahteng bad ban pynkhlaiñ ïa ka jingïatreilang hapdeng ka Directorate bad ki ophis jong ka District ban pynthikna ban pyndep ïa ki projek ha ka por kaba biang. U la kyntu ïa ki ophisar ban ïatreilang ban pynurlong ïa ki jingthmu jong ka tnad bad ban weng ïa ki jingeh kiba don ha madan da kaba suk.
Ka jingïalang ka la ai ruh ïa ka lad ïa ki District Housing Officer bad ïa ki Inspector ban ïasam ïa ki jingai jingmut jong ki bad ban pynpaw ha u Myntri ïa ki jingshisha ba ki ïakynduh ha ka kam.
