Shillong, Risaw 13
Ka Kynhun Myntri jong ka Sorkar Jylla ka la mynjur ïa ki 7 tylli ki mat ba kynthup ka Megha-laya School Education School Complex Rules 2026 ban pynïasoh ïa ki skul Lower Primary bad ki Upper Primary School ryngkat ki Secondary bad Higher Secondary School kaba thmu ban pynsuk ïa ki khynnah ïa ka jingeh haba ki rung skul.
Haba ïakren bad ki nongthoh khubor, u Myntri Rangbah ka Jylla u Conrad K Sangma u la ong ba kane ka kyndon ba thymmai kan pynïasoh ïa ki skul Lower bad Upper Primary lem bad ki skul Secondary bad Higher Secondary ba don marjan lyngba ki skul ba la jied kum ki nodal school kaba la tip kum ka “Meghalaya School Education School Complex Rules 2026.”
Haba batai ïa ka jingdonkam kane ka jingpynkylla, u la ong ka Meghalaya ka don haduh 9,244 tylli ki skul Lower Primary, 2,396 tylli ki Upper Primary, 1,755 tylli ki Secondary bad tang 532 tylli ki skul Higher Secondary.
“Ka jingeh ka jingdon jong ki skul ka pynlong ïa ki khynnah skul ban nym ïoh rung skul bad ka pynlong ruh ïa ki khynnah pule ban hap shim ‘admission’ haduh arsien, lai sien ha ka por ba ki dang don ha ka jingpule kaba mut ha ki katto katne ki khep, ki khynnah ki hap shim ‘admission’ shisien ha ka klas I, kaba ar ha ka klas VI, bad sa ha ka klas IX bad klas XI”.
“Ngi la pyrshang ban pynïasoh ïa ki skul LP, UP bad ki skul Secondary bad Higher Secondary kiba don marjan bad ngi kwah ban thaw ïa ki nodal school kiba lah ban pynsuk ïa ka jingai ‘admission’ khlem da donkam ïa ka Transfer Certificate (TC) bad kiwei ki jingdonkam kiba ju hap pyndep,” u la ong.
U la pynshai ba kane ka rukom treikam kan long da kaba mon sngewbha bad kan ym ktah ïa ka jinglaitluid jong ki skul ban pynïaid ïa la ki jong ki kam.
Shuh shuh u la ong ba kane ka jingpyrshang kan ïarap ruh ïa ka sorkar ban ithuh ïa ki jaka ba dang duna bad ban tei ïa ka rukom ïatreilang kaba kham khlaiñ hapdeng ki Secondary bad Higher Secondary School, khamtam ha ki Block bad Sub Division kiba dang sahdien ha ka jingdon jong ki skul.
Nangta ka Kynhun Myntri ka la mynjur ruh ïa ka jingpynkylla ïa ka Meghalaya Cooperative Societies Act 2015 da kaba pynkylla ïa ka kyntien na ka Registered Post sha ka Speed Post, ki la mynjur ruh ïa ka jingpynbeit ryntih ïa ki 26 ngut ki briew kiba la thung ha ka Adhoc Basis hashwa lane ha ka 31 tarik u Nohprah. La mynjur ruh ban pynkut noh ïa ki jingsiew ba ka Mawmluh Cherra Cement Limited kan siew sha ka tnad Taxation jong ka Sorkar namar ba kadei ruh ka kompeni ba longtrai da ka Sorkar.
Kiwei pat ki mat ba la mynjur ha kane ka sngi ki long ka jingtyrwa ïa ka Meghalaya Micro Small and Medium Entreprises Facilitation and Establishment of Operation Ordinance, na ka bynta ki MSME ha ka Jylla, la mynjur ban ai khublei kyrpang ïa u Myntri Rangbahduh ka ri u Narendra Modi namar ka jingkynjoh 25 snem ka jinglong nongïalam jong u kum u Myntri Rangbah ka Jylla Gujarat naduh u snem 2001 bad kum u Myntri Rangbahduh ka Ri naduh u snem 2014.
