Shillong, Risaw 13
U Myntri Rangbah ka Jylla, u Conrad K. Sangma ha ka Sngi Ba-ar u la ong ba ki ‘Pilot Project’ ba ïadei bad ka jingkhang dam ïa ki par dewïong hapoh ka Jylla ki dang don hapdeng ka jingpynkhreh bad la khmih lynti ba shen yn sa ïoh ïa ka jingbit.
“To ngan pyntikna ïa baroh ba ka jingkhang ïa ki par, ym ka jingker, hynrei ka jingkhang dam ïa ki par hi, ki ‘Pilot Project’ ki dang don ha ka jingpynkhreh. Ngi khmih lynti ba shen ngin sa ïoh ïa ki jingbit na ka bynta kata bad shen ngin sa lah ban ïaid shakhmat,” la ong u Conrad.
U la jubab ïa ki jingkylli halor ka ‘Interim Report’ kaba dang shu aiti shen da u Justice B.P. Katakey halor ka jingtih dewïong.
Hynrei u Myntri Rangbah u la ong ba u dang hap ban khmih bniah ïa ka kaiphod kaba tikna halor kane.
“Ngam tip shaphang ka kaiphod kaba tikna bad kan ym long kaba dei ïa nga ban jubab ïa kata, lehse ngan sa jubab hadien ynda nga la ïoh ïa ka kaiphod kaba kham bha halor kata,” u la ong.
Halor ka mat ba ïadei bad ka jingpyndonkam pisa, u Conrad u la ong ba ka rukom treikam hapoh ka ‘Meghalaya Environment Protection and Restoration Fund’ (MEPRF) ka dang ïaid shakhmat, hynrei ki rukom treikam ba la bthah da ka Sorkar Pdeng bad ka Ïingbishar ki la buh jingeh ïa ki kam.
“Ka rukom pyndonkam ïa ka pisa lyngba ka MEPRF ka dang ïaid shakhmat hynrei ka Sorkar India bad ka Ïingbishar ki la buh ïa katto-katne ki rukom treikam kiba ngi hap ban bud ban pyndonkam ïa kata. Kata ka paw shai ba ka la pynlong ïa ka kam ban kham buh jingeh khyndiat ïa ngi,” u la ong.
Haba kylli shaphang u dewïong uba 13 lak metrik ton uba la kdew ha ka kaiphod, u la ong, “Ban jubab kyrpang ïa kata ka jingkylli jong phi shaphang uta u 13 lak metrik ton, nga donkam ban ïoh shuh-shuh sa katto-katne ki jingtip.”
