Shillong, Risaw 13
U Lamphang ka Ïingdorbar Thawaiñ ka Jylla, u Thomas A. Sangma ha ka Sngi Ba-ar u la ong ba ka Ïingdorbar kam lah ban sospon ïa u MLA bad ka bynta jong ka, ka long tang ban pynbeit thymmai ïa ki jaka shong hadien ba la shimkhia ïa ka jingleh jong ka seng.
U Thomas u la ong ïa kane haba jubab ïa ka jingkynnoh jong u khlieh nongïalam ka VPP, u Bah Ardent Miller Basaïawmoit halor ka jingbym leh eiei pyrshah ïa u MLA ka North Shillong, u Bah Adelbert Nongrum.
“Em, ka jingshah sospon kam dei ka kamram jong u Lamphang ka Ïingdorbar Thawaiñ. Ka shong ha ka seng saiñpyrthei ne ka ‘Legislature Party’ ban leh katba ki mon. Ka dei ka kamram jong ki ban pyntip sha ngi. Ngi la shimkhia ïa kane. Ngi shu hap ban ai jaka shong la ka jong, tang katta,” ong u Thomas.
Halor ka jingmut jong ka jingpynbna ba la pynmih hashuwa, u Lamphang u la bynrap, “Ka jingpynbna ka mut ba la pynbeit thymmai ïa ka jaka shong, tang kata kaba ngi lah ban leh.”
