Shillong, Risaw 13
Ka Kynhun Myntri ka Sorkar Jylla ha ka sngi Ba-ar, kala ai jingmynjur ïa ka jingtyrwa ban pynkylla ïa ki kyndon jong ka Meghalaya Cooperative Society Act, 2015.
U Myntri Rangbah Conrad K Sangma u la ong, kane ka jingpynkylla ka kynthup ïa ka jingpynkylla ïa kawei ka kyntien ha ka kyndon 21 (1) jong ka Act, na ka “registered post” sha ka “speed post”.
U la ong ba kane ka sienjam ka dei kaba la leh halor ka jingbthah na ka Sorkar Pdeng. “Ka tnad Postal, ka Sorkar India kala bthah ïa baroh ki Sorkar Jylla ba kin pynkylla ïa kane ka kyntien na ka Act. Ka ‘Registered Post’ ka dei ka rukom kaba rim, katba ka ‘Speed Post’ ka dei ka rukom kaba thymmai,” u la ong.
Ka Kynhun Myntri kala ai jingmynjur ruh ïa ka thup jong ki sngi shuti ka Sorkar na ka bynta u 2027, kaba u Myntri Rangbah u la ong ba kam shym la don jingkylla na kaei kaba long mynshem snem.
