Shillong, Risaw 13
U Myntri Rangbah ka Jylla u Conrad K Sangma u la ong ba ïa ka jingdawa ban weng noh ïa u Advocate General Amit Kumar ym lah ban rai tang shi miet namar ba ka tnad aiñ ka dei kawei napdeng ki tnad kiba pynïaid ïa ka synshar khadar.
“Nga burom ïa ki jingsngewkhia jong ki paralok nongïasaid aiñ, namar ki don ki daw kiba ki ïakynduh bad u AG, ngam kwah ban kren eiei namar ba ka dei ka kam shimet, nga ruh nga la pyrshang ban pynsngewthuh ïa ki baroh ar liang,” u la ong.
“Na ka bynta ka Sorkar, ki tnad kum ka pla tyngka, ka Chief Minister Secretariat, ka tnad kam pohïing, ka tnad aiñ ki long kiba kongsan bha ym dei kum ka tnad ïalehkai bad ka tnad rep ka riang ha kaba ka jingtrei ka long tang ha kawei ne ar tylli ki tnad, hynrei kine ki saw lane san tylli ki tnad ki ïaid lang na bynta ban pynïaid ïa ka Sorkar,” u la ong biang.
U Conrad u la ong baroh ki briew ki lah ban bujli, baroh ki lah ban kylla, kam don jingeh hynrei kam dei kaei kaei kaba lah ban peit tang mynta bad leh lashai tang namar ba don kiba kylli, kumta u batai ïa kiei-kiei kiba hapoh namar ki briew ki dei ban tip ba kam long kaba suk ban shim ïa ki rai kiba eh kum kane.
“Ngin sa peit kumno ngin lah ban weng ïa ki jingeh, ban pynbha ïa baroh ar liang bad nga ngeit lyngba ka jingïakren ba ngi lah ban poi sha ki lad ki lynti kiba bha,” u la ong.
Shuh shuh u la ong ba ki don ki por ba ka Bar Association ki la kyntu ba um dei ban mih, ha kiba bun ki khep u AG um shym la mih. Hynrei ki don ki katto katne ki khep ba u hap ban mih namar ba dei tang ma u uba sngewthuh ïa ka phang bad lada um don, ka pynsniew ïa ki spah bad ki hajar ngut ki nongrep, ki nongtih marpoh khyndew, ki nonghikai.
Halor ka jingïajan bad ka longïing jong u Conrad, u la ong, “Nga la tip ïa u la slem bha. Dei hangta ba ka jingshaniah ka wan, ha kaba nga tip ba u briew um don jingthmu ba rieh.”
“Ha u snem 2008 haba ngi la thaw ïa ka sorkar, u PA Sangma uba la khlad noh u la tyrwa ïa ka kyrteng jong u Amit Kumar kum u AG sha u Dr. Donkupar Roy uba la khlad noh, uba dei u Myntri Rangbah ha kata ka por hynrei u la don uwei pat ha ka jingmut bad u la ïaid shakhmat,” u la pynkynmaw.
