Shillong, Risaw 13
Ka Sorkar Jylla ha ka sngi Ba-ar kala pyntip ïa ki nonghikai skul deficit ba ïa ka dearness allo-wance (DA) bala sah la slem bha, la dep ban pynlait da ki bynta-bynta bad bthah ïa ki ba kin pynsangeh noh ïa ka jingïakhih, haba ban jur ba ka jingïakren ym ka jingpynthut ïa ka kam, ka dei ka lynti ban pynbeit.
Ha ka jubab sha ka Khasi Jaiñtia Deficit School Teachers’ Asso-ciation (KJDSTA) bad ka Garo Hills Deficit School Teachers and Employees Association (GHDSTEA), ka tnad pule puthi ka la ong ba kala dep pyllait ïa ka arrear jong ka DA kaba sah na ki bnai ba sdang jong u snem 2024, katba ka jingsiew katkum ki dor kiba thymmai ka dang don hapdeng ka jingpynkhreh bad yn pyrshang ban pyllait shwa ka lehniam Puja.
U Joint Secretary, Bah D. Lyngdoh ha ka shithi jong u, u la ong, “Ka arrear jong ka DA kaba sah ha ka dor 43% na ka bynta ki bnai Kyllalyngkot bad Rym-phang 2024 la dep pyllait da ka tnad,” katkum ka hukum kaba la pynmih ha ka 28 tarik Nailur, ïa kaba la phah sha ki ophisar treasury.
Ïa ka pisa kaba dang sah, u la ong ba ka tnad ka dang pynïaid ïa ka kam ban “pynlait ïa ka DA kaba 51%, kaba treikam naduh ka 1 tarik Naitung 2025, bad 53%, kaba treikam naduh ka 1 tarik Kyllalyngkot 2026, ryngkat bad ka pisa kaba sah katkum kine ki dor,” bad bynrap “Ka tnad kala pyrshang kat kaba don ki lad ban pynthikna ba ïa ka jingsiew yn pynlait hashuwa ka shuti Puja”.
Haba ïadei bad ka kynrum kynram ka Centralised Provident Fund (CPF), ka Sorkar ka la shah ïa ki nonghikai kiba don ïa ki account SBI ba kin aplai na ka bynta ka Permanent Retirement Account Number (PRAN) bad ban aiti ïa ka sha u District School Education Officer (DSEO), khnang ban lah ban thep ïa ka synñiang pisa ha ki account jong ki. Kiwei ki bym don ïa ki SBI account kin hap ban ap naba ka Board of Trustees (BOT) ka dang pan ïa ka GSTN.
Ka shithi ka la pynpaw ruh ba la shah ïa ki nonghikai kiba la shongthait kiba kwah ban sei ïa ka CPF kaba la lang katkum ki kyndon, bad bun ngut ki la dep pyndep ïa ki jingdonkam.
Haba jubab halor ka jingdawa ban don ki nongmihkhmat jong ki nonghikai ha ka Board of Trustees, ka tnad ka la pyntip ba kala shimkhia ïa kane ka jingkyrpad bad la pynsngew sha u Chairperson jong ka BoT na ka bynta ban bishar bniah.
Halor ka jingdawa ban pyntreikam ïa ka draft CPF Scheme jong u snem 2023, ka Sorkar ka la kdew sha ka hukum jong ka High Court kaba la pynmih ha ka 10 tarik Nailur ha ka mukotduma WP(C) No. 281 of 2017, kaba la pynksan ïa ka CPF Scheme 2026, kaba la pynbna ha ka 18 tarik Lber.
Ka High Court, haba sot ïa ka shithi jong ka Sorkar, ka la ong ba ka jingpynmih ïa ka jingpynbna kaba 18.03.2026 halor ka Scheme 2026 hapoh ka aiñ jong u snem 1969 ka pyni ba la bud bha ïa ki kyndon kiba la bthah da ka Supreme Court.
Ka ïingbishar ka la pynshai shuh shuh “Ngi la kren shai ba ngi khlem bishar ïa ka nongrim jong ki jingpyrshah, ki nongmudui ki don ïa ka hok ban tynjuh pyrshah ïa ka skhim da ka lynti aiñ kaba dei, lada ki sngew donkam.
Ka tnad Pule Puthi ka la ong ba kino-kino ki jingpyrshah halor ka Scheme 2026 ki lah ban leh eiei katkum ka lynti ka aiñ, bad ka Sorkar kan kohnguh ïa ki hukum jong ka ïingbishar.
Haba pynshai halor ka jingthungkam, u Bah D.Lyngdoh u la ong, ka jingthung briew ha ki kam deficit ba lait thylli, ka dei kaba hap ban leh da ki School Management Committee, kaba long ka bor thungkam, ryngkat bad ka jingmynjur na u DSEO ne SDSEO.
Haba kyntu ïa ki nonghikai ba kim dei ban pynïaid shakhmat ïa ka jingïakhih, ka tnad ka la ong ba ka samoi pule ka la jan kut bad ka jingdon jong ki nonghikai ha ki klas ka long kaba kongsan bha na ka bynta ki khynnah skul.
“La kyrpad ïa ka Association ban pyrkhat biang ïa kano-kano ka jingthmu ban ïakhih bad ban ai ka jingïatreilang jong ka ha kaba pynbeit ïa ki jingeh kiba dang sahteng lyngba ka jingïakren bad ïamir jingmut,” la ong ka shithi, da kaba maham ba ka jingpynthut kan ktah ïa ki khynnah.
“Ka Sorkar ka ithuh pura ïa ka jingnoh synñiang kaba kordor jong uwei pa uwei u nonghikai bad ki nongtrei bym dei nonghikai. Ka tnad ka ngeit skhem ba ka jingïakren, ka jingsngewthuh jingmut bad ka jingïatreilang kaba tei ka ai ïa ka lad kaba kham biang ban pynbeit ïa ki mat kiba dang sahkut,” ka la bynrap.
