Shillong, Risaw 13
U Myntri Rangbah ka Jylla u Conrad K Sangma u la ïathuh ba ka Kynhun Myntri ka Sorkar Jylla ha ka sngi Ba-ar kala rai ban pyndam noh ïa ka ram ba palat T.24 klur ba la shah da ka Mawmluh Cherra Cement Limited (MCCL) sha ka Sorkar Jylla, kaba pynkhuid ïa ki kam baroh.
U la pyntip ba ka pisa ba pynsah ka kynthup ïa T.8.9 klur ka ‘sales tax’ bad T.15.53 klur ka khajna ba dang hap siew ka MCCL.
U la ong katba ïa ka rai ban khang ïa ka kompeni la shim slem bha bad baroh ki bai nongtrei la dep ban siew, hynrei ki ram kiba dang sahteng, ki khanglad ïa ka jingkhang dam ïa ka kompeni.
“Kine ki dei ki jingkitkhlieh kiba dang sahteng ha ki kot jong ka MCCL bad ngim lah ban khang bad pynkut noh ïa ka kompeni khlem da pyndep ïa kine ki jingsiew,” la ong u Conrad.
U la ong ba ka Kynhun Myntri ka la rai ban thoh noh ïa katei ka pisa namar ba kan long tang ka jingpynbeit ïa ka kot.
“Namar ba ka MCCL ka dei ka kompeni jong ka Sorkar, ka Sorkar Jylla kan hap ban siew ïa ka MCCL bad ka MCCL kan siew biang ïa ki tnad, kan long tang ka jingïatyllun kumta khnang ban lait ïa ki jingeh, ngi la rai ban thoh noh ïa ka bad kam don kano-kano ka jingktah ha ka liang ka pisa tyngka,” u la ong.
