Shillong, Risaw 13
U Bah Jeningstar Lyngkhoi, u rangbah uba la thiah pang ha jingthiah la kumba 6 bnai mynta, u la ïathuh ba ka jingpang ka la shu suh shu thar khlem sngewthuh shuh.
U Bah Jeningstar u la ong, ba katno u isynei ban peit ïa ka lok bad ki khun ba kin hap shah ïa ki jingeh, wat haduh ka bam, tang namar ba um lah shuh ban leit bylla pyndap ïa ka ïing ka sem.
U Bah Jeningstar u dei uba la don 10 ngut ki khun, uba dei na ka shnong Domkyrkoh, West Khasi Hills, Rambrai Konstitwensi bad ka jingshitom jong u, ka Lok bad ki khun ki la shem shibun ki jingeh namar ym don shuh ban pyndap pynbiang ïa ka ïing ka sem.
U Bah Jeningstar Lyngkhoi u la buh ka jingkyrpad ba lada don mano-mano ki ban sngew synei lem, kin phai khmat lem da ki kti ba sbun, bad ban ïarap lem ïa ka ïing ka sem jong u, ha kaba ki khun ki dang rit.
Shuh shuh u Bah Jeningstar u la kyrpad sngewrit ïa u MLA bad MDC ka thaiñ jong ka Konstitwensi Rambrai, ba kin kner lem ïa ki jingïarap da kano-kano ka lynti, namar kim lah shuh ban dang wan kynduh markhmat ha kum kane ka por kaba eh.
Katkum ka jingïathuh jong ka Kong Dimo Nongsiej, ka lok jong u Bah Jeningstar, ba mynta ki hap ban siew sa ïa ka ram kaba la kot sha ka 1,50,000 tyngka kaba ki la shim na ka bynta ban phah sumar sha Civil Hospital, Shillong.
Ka long shisha ka jingshem kaba sngewmyllung ba kum ka longïing ka hap ban mad ïa ki jingeh, kiba ban khia ïa ka ïing ka sem, khamtam ha kaba ki khun ki dangrit bad kim pat tip ei-ei.
