Shillong, Risaw 13
U Lamphang ka Ïingdorbar Thawaiñ ka Jylla, u Thomas A. Sangma ha ka Sngi Ba-ar u la ong ba ka kam ba ïadei bad ka jingleit pynïasoh BJP jong ki 8 ngut ki MLA ka UDP ka dang don hapdeng ka jingkhmih bniah bad um pat ai jingmynjur ban ithuh ïa kane.
“Nga dang khmih bniah ïa kane, kumta ngan ym ong ki MLA ka BJP. Ka jingpynïasoh bad ka BJP ka dang don hapdeng ka jingpyrkhat bad nga dang ap ïa ka jingai jingmut na ka liang ka aiñ,” la ong u Thomas haba kren sha ki nongthoh khubor.
U la ong ba ki 8 ngut ki MLA ki la wan ïakynduh ïa u bad u la pyntip sha ki ba un dang donkam por shuh haba ïadei bad kane ka kam.
“Ki la wan sha nga kum ka jingwan jngoh sngewbha. Nga la batai sha ki ba nga dang khmih bniah ïa kane ka kam bad nga donkam por shuh haba ïadei bad kane,” u la ong.
U Lamphang u la ong ruh ba u dang ap ïa ki jingthoh (ba la pynbeit) na ka United Democratic Party.
“Ka la don ka jingthoh na u Bah Metbah Lyngdoh bad ka UDP. Ki jingthoh jong ki, ki don jingduna khyndiat, kumta nga la ai por 10 sngi ïa ki ban pynbeit ïa kata. Ka por jong ki kan kut noh lashai ka sngi. Nga dang ap ïa kata bad ïa ki jingai jingmut na ka aiñ na ki tyllong bapher-bapher,” u la ong.
Haba ïadei bad ka jingpynslem, u Thomas u la ong, “Ka ophis jong u Lamphang kam lah ban shu rai kumta. Nga hap ban da phikir bha. Nga la ai ïa ka rai jong nga ha ka por ba la phiah ïa ka Congress ruh. Wat ka Parliament kam shym la lah ban shim rai haduh mynta. Ym dei ba nga pynslem khnang. Nga dang shim ïa ka por jong nga khnang ba nga lah ban shim ïa ka rai da ka jingmut kaba shai.”
Halor ki jingduna ha ka jingthoh jong ka UDP, u la ong, “Katkum ka jingai jingmut jong ka aiñ, ki don katto-katne ki jingduna, ki jingai jingmut jong ki kim da shai bha.”
Haba pynshai ïa ka bynta jong u, u Thomas u la ong, “Kum u Lamphang, ngam lah ban ithuh ïa ka jingpynïasoh namarba ka dei ka kamram jong ka ‘Election Commission of India’. Nga dang khmih bniah ïa ka jingpait jong ka seng.”
U la bynrap ba ki jingjia kiba hashuwa, kynthup ïa ka jingpynïasoh TMC ka Congress bad ka rai jong u hi kaba kham hashuwa kaba dang don hapoh ka jingpeit bniah jong ka ‘High Court’, ki dang don hapdeng ka jingkhmih bniah.
“Kaba nyngkong ka long ban rai halor ka ‘petition’ jong ka UDP katkum ki jingjia kiba la jia. Nga dang khmih ïa ka ‘petition’ ba ïadei bad ka jingmait kyrteng,” u la ong.
Haba kylli kumno dei ban khot ïa ki 8 ngut ki MLA katba dang ap ïa ka rai jong u, u Thomas u la ong, “Kata ka dei ka jingkylli kaba nga ruh nga kylli ïalade. Ïa kane yn sa peit kaba kum kano ka rai kaba ngan shim.”
Ha kawei ka liang, u Myntri Sorkar, Bah Lahkmen Rymbui lem bad ki 7 ngut kiwei pat ki MLA barim ka UDP kiba la pynïasoh sha ka BJP ki la ïakynduh ïa u Lamphang ka Ïingdorbar, u Thomas A. Sangma ha ka Sngi Ba-ar.
U Bah Rymbui u la ong ba ki la pyntip ïa kane ka jingpynïasoh kham hashuwa hynrei u Lamphang um shym la don shane.
“Kumba ngi tip ba ha katei ka sngi u Lamphang um don shane. Kumta, ngi la wan mih hi da lade mynta ka sngi, baroh ngi la pynkynmaw biang ïa kaei kaba ngi la pynsngew ha katei ka sngi,” la ong u Bah Rymbui.
