Shillong, Risaw 14
Ki bor distrik ka East Khasi Hills, ki la hukum ban pynlong da ka jingtohkit majistor halor ka jingkynnoh lum pisa be-aiñ jong ki pulit ha kawei ka ‘Check-Post’, kaba la paw pyrthei ha ka jingkhynra ‘Sting Opera-tion’ jong ka Khasi Students’ Union (KSU).
U Deputy Commi-ssioner, u Abhilash Baranwal ha ka Sngi Balang u la ong ba katba ki pulit ki la aiti ïa ka kaiphod jong ki, ha kajuh ka por donkam ïa ka jingtohkit kaba laitluid ban sngap ïa baroh ki liang.
“Ngi la thung ïa ka jingtohkit majistor haba ïadei bad kaei kaba la jia, ka dur-khih kaba baroh ki la ïohi.
U SP ka East Khasi Hills u la dep ban aiti ïa ka kaiphod jong u. Ka kaiphod na ki pulit ka dei kaba mihkhmat tang ïa ka liang jong ki pulit,” la ong u Baranwal.
U la ong ba la bynshet kam ha uwei u Additional District Magistrate ba rangbah haba ïadei bad kane ka jingtohkit.
“Nga la thung ïa ka jingtohkit majistor hapoh ka jingpeit jong uwei u ADM ba rangbah, ïa kaba la bynshet ïa ka jingkitkhlieh ha u ban aiti ïa ka kaiphod hapoh ka 31 tarik u Risaw,” u la ong.
U DC u la ong ba kane ka jingtohkit kan bishar bniah ïa ki jingpynsngew jong ki nongujor, ki pulit bad ki nongkit mar.
“Kane ka jingtohkit kan shim ïa ki jingkren na ki nongujor, na kito kiba la leit sha ka ‘Check-Post’, bad kito ki pulit ‘Constable’, bad lehse na kiwei pat ki nongkit mar. Man uwei-pa-uwei u nongshim bynta, uno-uno uba donkam ban shah khot bad kylli jingkylli, ka jingtohkit majistor kan pyntikna ba ka long kaba bit ba biang bad kaba pura, bad ka ban wanrah ruh ïa ka jingshisha ba mano ba la bakla,” bynrap biang u Baranwal.
