Nongstoiñ, Risaw 14
Ka Voice of the People Party (VPP) West Khasi Hills ryngkat bad ka VPP State Youth Wing ha ka sngi Balang kala leit ban ïakynduh bad ujor sha ka District Medical & Health Officer (DMHO) West Khasi Hills hadien ba ka VPP kala ïoh ïa ki durkhih ïa kaba la phah sha ka seng, ba ha ka 13 tarik mynta u bnai ka don kawei na ki jingïalang jong ka NPP Rambrai-Jyrngam ha ka shnong Mawkhiat bad la ong ba katkum ka jingïohi na ki durkhih, ïa ka jingïalang ka NPP la pynlong ha kawei na ki Sub Centre, ïa kaba la tip kum ka Mawkhiat Sepngi Sub Center kaba hap hapoh ka PHC Rambrai.
U Bah Robert Wahlang, Secretary ka VPP West Khasi Hills haba kren halor kane ka bynta u la ong, “Kane kala pynlyngngoh ïa ngi ba kumno ka seng saiñ hima sima, ka lah ban pynlong jingïalang ha ki ïing Sorkar kiba dei ki jaka ban ai ka jingshakri ïa u paidbah.”
Shuh shuh u la ong ruh ba ka seng ha kaba ïadei bad kane, kam lah ban shu peit kai bad sngap hynrei kala ïakynduh ïa ka DMHO bad buh ruh ïa ka jingujor ba kum kine kiei-kiei kim ïahap, ba ha ki jaka treikam jong ki tnad Sorkar ba ki seng saiñ hima sima kin ïa pynlong pynban ka jaka ban pynlong jingïalang la ka long ïa kiwei lane ïa ka VPP, kane hi ka bym lah ban long.
U Bah Robert u la ong ruh ba sa kawei pat lada phai sha kane ka bynta ki mih bun kiei-kiei ha kaba ïadei bad ka dong ka thaiñ Rambrai khamtam ïa ki jingjia kiba dang shu dep jia ha kine ki por ba la leit noh ïa ka jingkhlad noh jong uwei u khunlung na kane ka dong ka thaiñ hi.
U la kam ruh ba kala mih ka jingkynnoh ban ong leh politik ïa ka jingkhlad jong i khyllung khamtam ïa ka VPP hynrei da kaba shai kato ka jingïalang kaba ki pynlong, shibynta ka don ka jingïadei bad kato ka jingjia hapoh Domkyrkoh namar ba katkum ka jingtip kaba la ïoh lum na ki katto katne ki riew paidbah jong ka dong ka thaiñ ka long ba ki la phah ban pan map ïa kito ki briew ha kaba ïadei bad ka jingmih jong ki durkhih bad kren ruh ha kaba ïadei bad ka surok Domkyrkoh ba lada kine ki briew ki leh ha kane ka rukom wat ban pynduh noh ïa ka surok, kaba kum kita ki jingbyrngem.
U Bah Robert u la kam ruh ba ka don ka jingïakren kaba ong, namar ba kane ka Sorkar kala leh bha ka wanrah ïa katei ka surok, kumta baroh ki shnong ki dei ban ïa tylli ban ai ka jingkyrshan sha ka NPP.
“Na ka liang ka jong ngi, ngim don eiei ban kren halor kane ka bynta hynrei ngi shu sngew danda shibynta namar ki kam pynroi ha kano-kano ka dong ka thaiñ ha ki konstitwensi bapher-bapher ka dei ka kamram ka Sorkar ba ka dei ban leh bad ka kamram hi ban wanrah ïa ka roi ka par ha ki thaiñ Nongkyndong khamtam ha kitei ki jaka kaba ki shem jingeh shisha baroh shikatta,” ong u Bah Robert.
U la kynnoh ruh ba kane projek surok ruh kam dei ka projek shimet jong ka NPP, jong u MLA bad MDC ka Rambrai hynrei kane ka projek ka dei na ka bynta ka roi ka par jong ka thaiñ Rambrai bad ïa kane la bei tyngka lyngba ka pisa jong u paidbah.
Haba kren halor ka jingïakynduh bad ka DMHO, u Bah Robert u la ong ba ka DMHO ka la kren shai ba haduh mynta kam pat ïoh jingtip eiei bad na ka liang jong ka, kan sa shimkhia ïa kane ka bynta bad kan sa shim ruh ïa ka sienjam da kaba tyngeh ïa ki briew kiba pyndonkam bakla ïa ka jaka ai jingsumar ha Mawkhiat.
