Shillong, Risaw 14
U Symbud Myntri Rangbah ka Jylla bad National Vice President ka NPP Bah Sniawbhalang Dhar ha ka sngi Balang u la kam ba ki nongkyrshan jong ki 8 ngut ki MLA barim ka UDP kiba la leit ïasoh bad ka BJP, mynta ki la wan sha ka NPP bad kumta ka jingleit ïasoh jong ki, kan nym ktah satia ïa ka NPP ha ka ilekshon MP shiteng samoi.
Haba kyntait ïa ka jingsheptieng ba ki nongkyrshan ka UDP kin kynriah noh sha ka VPP, u Bah Sniawbhalang u la ong, “Balei phi ong kumta? Sngewbha peit katkum ki rikod, ha ka ilekshon MP kaba la dep jan baroh ki nongthep vote ki la leit tang sha ka VPP, ka UDP ka la ïoh tang 40,000 tam eiei, ka NPP ka la ïoh 1,80,000 tam, mynta pat ki la wan sha ngi, kam don jingktah eiei satia.”
U la ban ruh ba u kyrtong ka NPP u la nangkhlaiñ nangkhlaiñ katba nangmih ki sngi ha kylleng ki bynta jong ka Jylla.
“U kyrtong jong ngi u la nang khlaiñ nang khlaiñ na kawei ka sngi sha kawei pat bad u la nangïoh bor ïoh jingkyrshan na kylleng ki bynta jong ka Jylla,” la ong u Bah Sniawbhalang.
Halor ka jingwan ki paidbah sha ki jingïalang, u la ong, “Ka jingwan jong ki paidbah, phi la ïohi hi da la ki jong ki khmat, katkum ki sakhi ha ki jingïalang, manla ki jingïalang ki paidbah ki poi smam smam.”
Shuh shuh u la ong ba ka jinglong hakhmat jong ka NPP ka dei ruh lyngba ka jingtrei shitom jong ki nongtrei jong ka bad ruh ka jingïoh ïa u kyrtong ba thymmai.
“Ki nongtrei jong ngi, ki la trei shitom bad u kyrtong jong ngi ruh u dei uba thymmai bad u bym don dak eiei bad kata ka dei ka daw ba ki paidbah ki sngewtynnad ïa u. U long shisha u briew uba la ih, ba donburom, uba la biang ka kyrdan pule, kumta ki paidbah kin phaikhmat sha u,” u la ong.
Haba kylli hato ka NPP kan kyrpad ïa ka BJP ban nym pynïeng kyrtong ha kane ka ilekshon MP shiteng samoi, u Bah Sniawbhalang u la ong, “Em, baroh ki seng saiñpyrthei ki long laitluid ban pynïeng kyrtong, ym don jingeh eiei ha kata ka liang, kan nym ktah satia.”
