Shillong, Risaw 14
Palat 88,000 ngut ki samla pule ST ha Meghalaya ki la ïoh pdiang ïa ka baibam kaba pura hapoh ka ‘Umbrella Post-Matric Scholarship’ na ka bynta u snem 2025-26, ha kaba ka Jylla ka la pyllait ïa ka bhah kaba khatduh ha ka Sngi Balang.
U Myntri Rangbah ka Jylla, u Conrad K. Sangma u la pyllait ïa ka ‘Instalment’ kaba ar bad kaba khatduh ha St. Anthony’s College, Shillong, da kaba pynpaw ba ka baibam ka ïailong ka jingsngewkhia kaba kongsan na ka bynta ki samla pule.
“Kawei na ki jingeh ba kongsan jong ki samla pule ka ïadei bad ka baibam. Mynta ka sngi nga sngewkmen shi kat dei ban pyllait ïa ka baibam na ka bynta u snem pule 2025-26 bad ban pynurlong ïa ki jingangnud kumjuh ïa katto-katne ki jingdonkam jong phi,” u la ong.
U la ong ruh ba ïa ka rukom treikam jong ka DBT la dep ban sdang bad ki samla pule kiba dang sahteng ka jingsiew ki dei ban pyntikna ba ka ‘bank account’ jong ki ka long kaba treikam bad kaba la pynïasoh bad u ‘Aadhaar’ lyngba ki shlem pule jong ki.
U Conrad u la ong ruh ba ki don ki nongïoh jingmyntoi ba la pynshisha ki bym pat ïoh namarba ym pat pynïasoh ïa u ‘Aadhaar’ bad ka ‘Account’ kaba treikam lane ki jubab jong ka ‘PFMS’ kiba dang sahteng, bad la bthah ïa ki tnad treikam ban buddien bad pyntreikam biang ïa kawei-pa-kawei ka ‘case’ tad haduh baroh ki nongïoh jingmyntoi kiba dei hok kin ïoh ïa ka jingsiew kaba pura.
“Na ka bynta jong ngi, phi dei ka bynta kaba kongsan tam jong ka Sorkar jong ngi bad phi long ka bynta ba pdeng jong ka jingshim rai jong ka Sorkar,” u la ong ha ka jingïalang jong ki samla pule na St. Anthony’s College bad ki jaka pule ba marjan, da kaba bynrap ba ïa ki polisi Sorkar la saiñdur da kaba buh ha ka jingmut ïa ka bha ka miat ki samla pule.
U la kyntu ïa ki nongïoh jingmyntoi ba kin pyndonkam hok ïa ka pisa na ka bynta ki jingdonkam jong ki ha ka pule-puthi.
Ha kane ka sngi, u Myntri Rangbah u la plie ruh ïa ka ‘PG Block Biotechnology Department’ bad ka ‘Bio-Informatics Lab’, ki jingdonkam ba la pynthymmai bad ki tiar ‘RUSA 2.0’ bad ïa ka ‘Computer Lab’ hapoh ka ‘CM Skills Mission’ ha katei ka kolej.
Katkum ki jingkheiñ ba tikna, la pynshisha ba ki don 96,801 ngut ki samla pule na ka bynta u snem 2025-26, ha kaba 88,061 ngut, kata 91%, ki la ïoh pdiang ïa ka pisa ba pura. Kane ka kynthup ïa 52,839 ngut ki nongaplai thymmai bad 35,222 ngut kiba pynthymmai.
Baroh ka pisa ba la pyllait na ka bynta une u snem ka long T.198.43 klur. Ka sien-siew banyngkong kaba long T.93.95 klur, T.84.55 klur na ka Sorkar Pdeng bad T.9.40 klur na ka Jylla, la pyllait kham hashuwa. Ka sien-siew kaba ar kaba long T.104.48 klur ka kynthup ïa T.94.03 klur na ka Sorkar Pdeng bad T.10.45 klur na ka Jylla.
Ha kane ka sngi la ïadon lang ruh u Myntri ka tnad pule-puthi, u Bah Lahkmen Rymbui, u Myntri Sorkar, Bah Sanbor Shullai, Commissioner & Secretary, u Vijay Mantri, u Principal, Fr. Arcadius Puwein bad kiwei-kiwei.
