Shillong, Risaw 14
U General Secretary ka UDP Bah Titos Chyne uba dei u nongïalam Liang Pyrshah ha KHADC u la pyntip ba ka UDP ka hap ban lum ban lang ban pynkhlaiñ biang ïa kito ki Constituency jong kito ki MLA kiba la phet.
U la ïathuh ba ka seng kan hap ruh ban wad kyrtong na bynta ban pynkhreh ïa ka ilekshon MLA ban sa long ha u 2028.
Shuh shuh u la pyntip ba ki don bun ngut ki riew rangbah kiba la kwah ban wan pynïasoh sha ka UDP ban pyn-khlaiñ ïa kane ka seng khamtam haba pynkhreh ïa ka ilekshon MP Lok Sabha.
U Bah Titos u la ïathuh ba ka seng kan ïaid shakhmat ban ïakhun ïa ka ilekshon MP Lok Sabha namar ka la dep pynbna ïa u Bah VGK Kynta kum u kyrtong.
Haba ïadei bad ka jingbym pat shim rai u Lamphang ka ïingdorbar ïa ki phra ngut ki MLA kiba la phet sha ka BJP, u Bah Titos um kwah ban ong eiei namar ka dei ka rai jong u Lamphang.
Halor ka jingkylli la kine ki phra ngut ki dei ne em ba ki shet kylla ïa ki paidbah kiba la jied ïa ka seng riewlum, u la ong ba ka rai ka shong ha ki paidbah.
