Shillong, Risaw 14
U National Vice President ka National People’s Party (NPP) Bah Sniawbhalang Dhar uba long ruh u Symbud Myntri Rangbah ka Jylla ha ka sngi Balang u la ong ba ym lah satia ban shim ba kata ka rally jong ka Voice of the People Party (VPP) kaba la pynlong ha madan Polo kan dei kaba heh namar wat tang 10 hajar ngut ki paidbah ruh kam shym la lah ban lum na ki 36 tylli ki konstitwensi.
“Ka rally jong ka VPP ka la dei na ka bynta ki 36 tylli ki konstitwensi, hynrei wat tang 10 hajar ruh ym shym la poi u paidbah. Kumno phi lah ban ong ba la lah ban lum briew bun? Kam dei satia kaba la lah ban khring ïa u paid ba bun,” la ong u Bah Dhar haba kynthoh halor ka jingkylli halor ka rally ba dang shen jong ka VPP kaba la pynlong ban pan jingkyrshan na ka bynta u kyrtong ka VPP Dr.Batskhem Myrboh u ban ïakhun ïa ka ilekshon MP shiteng samoi na Shillong.
Shuh shuh na ka liang une u National Vice-President ka NPP u la ong lada ka seng jong u, ka khot bad wer ïa ki nongkyrshan na ki 36 tylli ki konstitwensi, ka jingwan jong ki paidbah kan long lai shah na ka jingwan jong ki paidbah sha ka jingïalang ka VPP.
“Lada ka NPP ka khot na baroh ki 36 tylli ki konstitwensi, kan long lai shah ban ïa ka rally jong ka VPP. Phi dei ban tip ba ka dei ka jingïalang paidbah na ka bynta ki 36 tylli ki konstitwensi hynrei wat tang 7000-8000 ki briew ruh khlem lah ban lum. Kumno phin lah ban ong ba la shlei u paidbah? Kata ka dei kaba la sakhi,” u la bynrap.
