Shillong, Risaw 14
Ka Village Water and Sanitation Committee (VWSC) jong ka shnong Jakrem ha ka 14 tarik u Risaw 2026 ka la mih shakhmat ban pynshai paidbah haba ïadei bad ka jingmih khubor ha kine ki khyndiat sngi ba ka shnong Jakrem ka kyrduh um bad ki nongshong shnong ki mad jingeh.
Na ka liang ki nongïalam ka VWSC ki la kubur haba ïadei bad ka jingkyrduh um ha ka shnong ha kine ki arsnem kiba la leit ha kaba ki paidbah ki la mad jingeh na ka daw jong ka jingtyrkhong um ha ki katto katne ki dong.
Watla katta, ka VWSC ryngkat bad ka shnong baroh kawei kim shym la thiah thai, ki ïai wad ïa ki lad ki lynti ban pynduh ïa kane ka jingeh ba ki paidbah ki mad.
Ki nongïalam shnong ki la leit ban kynduh la bunsien ïa ki engineer ka PHE Mawkyrwat Division ban ïa pyrkhat bad saiñdur janai halor kane ka kam. Ka VWSC ka kyrpad ïa ka ophis ban pynbha ne maramot ïa ki pump kiba la duh bad na ka liang ka ophis ruh ka la ïarap ban wad ki lad ki lynti ban pynbha bad maramot ïa ki pump kiba la duh, kiba lah ban ai um ïa ki saw tylli ki kyntoid dong, kata ka Dong Mission, Laitmawbah, Nonghalait (Pyndensiej) bad Sngimietnah.
Shuh shuh na ka liang ka ophis ka la ïathuh ba ka daw jong ka jingduh khah khah ki pump um ka dei na ka jingduna ka voltage jong ka light. Kumba long ha kine ki snem ba la dep ka jingïoh um bam um dih ha ka shnong Jakrem kam da long thikna namar ka jingduna ki tyllong um, wat hadien ba la ïoh ïa ka skhim JJM ruh ki tyllong um ki neh hi kumjuh bad ki pump um la shu pyndonkam da ki pump kiba rim kiba la palat 20 snem tam.
Na ka liang ka VWSC Jakrem ryngkat ka bor shnong ki ïatreilang ryngkat-ryngkat bad ka ophis PHE Mawkyrwat Division ban peit ba ka um bam umdih ha ka shnong kan biang bad kaba pynkmen ïa ki paidbah nongshong shnong ka long ba dang shen ka Sorkar ka la mang pisa ban pynbiang um ïa ka shnong Jakrem lyngba ka skhim ba thymmai kaba u MLA ka Mawkyrwat u la wan ban buh ïa u mawnongrim bad mynta ka ophis PHE ka la khot tender ïa kane ka skhim um ba thymmai.
Kumta ka VWSC ryngkat bad ka Executive Dorbar Shnong ka ai khublei ïa ka ophis PHE Mawkyrwat Division kaba la leh shitom ban pynïoh ïa ka skhim ba thymmai kaba yn pump um na wah Rilang. Ka VWSC ka kyrmen ba lyngba kane ka skhim bathymmai kan long ka jingkyrkhu bakhraw ïa ki paidbah nongshong shnong jong ka shnong Jakrem.
