Shillong, Risaw 14
U Shongknor ka ïingdorbar ka Khasi Hills Autonomous District Council (KHADC) u Bah Strongpillar Kharjana u la pyntip ba u dang ithuh ïa ki ar ngut ki MDC na ka UDP namar ki rung BJP kum ki MLA.
Kine ar ngut ki MDC ka UDP kiba dei ruh ki MLA ha ka juh ka por, ki long u Bah Synshar Lyngdoh Thabah na Sohiong Constituency bad u Bah Pius Marwein uba na Ranikor Constituency.
“Haduh mynta nga shu ïohi tang ha ki lad pathai khubor ba ki ar ngut ki MDC kiba dei ki MLA ki la rung sha ka BJP namar ki khlem wan pyntip ïa nga da ka jingthoh ba ki la don sha kawei ka seng bad ïa ki, nga shim kum ki MDC ka UDP” u la ong.
U la ïathuh ba wat u MDC shimet na Rambrai-Jyrngam u Bah Lurshai Kharbani u la rung sha ka NPP hynrei la ithuh ïa u kum u MDC shimet namar u khlem wan pyntip da ka jingthoh.
“Haduh mynta kam don ka kyndon ba lada ki rung sha kawei ka seng donkam ban da pyntip sha u shongknor” u la ong.
U Bah Strongpillar u la ong ba kine ki ar ngut ki MDC ka UDP kata u Bah Synshar bad Bah Pius ki lah ban rung sha ka BJP kum ki MLA katba kum ki MDC ki lah ban dang don ha ka UDP.
Kumban shu pynkynmaw ki phra ngut ki MLA ka UDP kaba kynthup ïa ki ar ngut ki MLA kiba bat lang ïa ka shuki MDC ki dang don ha ka jingbishar jong u Lamphang ka ïingdorbar thawaiñ ka Jylla hadien ba ki la rung sha ka BJP namar ka UDP ka la dep sospon ïa ki lai ngut ki MLA kiba ïaleh pyrshah ïa ka seng.
