Shillong, Risaw 15
Ka Hynñiewtrep Youths Council (HYC) ka la pynpaw ka jingsngewkhia ïa ka jingbym poi ka umbam umdih jong ka skhim Jal Jeevan Mission (JJM) ha ka shnong Kher Jatap bad Lum-u-Smon kaba hap hapoh ka Shella Sub-Division ha kine ki saw-san bnai ba la lah.
Ha ka dorkhas ba la aiti sha u SDP, ka tnad PHE, Shella ha ka sngi Palei ïa kaba la soi da u Vice President ka HYC u Bah Shella B Natep bad President ka HYC u Bah Jatap P Shongwan, ka HYC ka la pynpaw ba kine ki shnong ki la mad ka jingeh kaba khraw namar ka jingbym poi um hapoh shnong.
“Ki nongshong shnong ka Kher Jatap bad Lum-u-Smon kim shym la ïoh um lyngba ka skhim JJM mynta la 4-5 bnai. Ka jingbym ïoh um, ka la buh ïa ki paidbah ha ka jingeh ba khraw ban pynbiang ïa ka jingdonkam umbam umdih bad kiwei ki jingdonkam ba man ka sngi” la ong ka HYC.
Nalor kata ka la kdew ruh ba ka jingthmu jong ka skhim JJM kam long shuh kaba jop lada ki nongshong shnong ki hap ban mad ïa ka jingtyrkhong um ba neh da ki bnai, “Haba don ki skhim kum ka JJM ban pynïoh um, hynrei ki briew ki hap ban mad jingtyrkhong um ba da ki bnai, kane pynmih ïa ka jingartatien ïa ka rukom treikam bad ka jingpeit ïa ka rukom sam um hapoh ka skhim” ong ka HYC.
Ka HYC ka la kyrpad ïa ki kum u Ophisar ba dei khmih ïa ka PHE Shella Sub-Division ban khmih kyrkieh ïa kane ka kam bad ban pynlong ruh ïa ka jingleit jurip ha Kher Jatap bad Lum-u-Smon ban wad ïa ki daw tynrai ka jingbym poi um bad ban pynlong ïa ka jingmaramot ba mardor.
Namar kata HYC ka la dawa ruh ïa ka tnad ba kan pynbiang ïa kiwei pat ki lad ban pynpoi um sha kine ki shnong ha kajuh ka por ka la ong “Ngi kyrpad ruh ba dei ban pynbiang biang ïa ka jingsam um khlem jingthud bad lada donkam por ban maramot ïa ki bynta ba sniew, dei ban pynbeit ïa ki lad ban pynpoi um shipor lyngba kiwei pat ki rukom tad haduh ban dep ka kam”.
