Shillong, Risaw 15
U Bah Paul Lyngdoh uba dei u MLA ka UDP bad ruh u Myntri barim ka Sorkar Jylla ha ka sngi Palei u la buh jingkylli ïa ka Joint Action Committee (JAC) ba balei ki mih ban pyrshah mynta u 2026 haba ïa ka jingbit ban tei ïa ka projek Shillong Ropeway la ïoh naduh u snem 2022.
“Ki jingbit baroh kum ka Environmental Clearances na ka bynta ka jingtei ïa ka Shillong Ropeway Project la ïoh naduh u snem 2022 hynrei balei pat ba hap ap haduh saw snem kata ha u 2026 ban mih ban pyrshah ïa katei ka projek Ropeway,” la buh jingkylli u Bah Paul.
“Nga kwah ïa phi ba phin pule bniah shwa, khmih ïa ki kot ki sla kiba kongsan. Baroh ki Environmental Clearance la pan bad la ïoh ha u snem 2022, ha ka por ba nga long u dkhot jong ka District Council. Hadien katei la ïoh ruh ïa ka jingbit na ka MoEF,” la ong u Bah Paul.
“Ki Dorbar kiba dei khmih kim shym la pyrshah eiei ha kano-kano ka por ruh, u MLA ka thaiñ ruh um shym la pyrshah eiei ha kano-kano ka por ruh. Ïa kane lah dei ban pynpaw naduh u snem 2023, 2024 bad 2025. Balei kine ki kynhun kila pyrshah mynta ha u snem 2026?” u la buh jingkylli.
U Bah Paul u la kdew ruh “Ki Environmental Clearance ki dei ki sienjam kiba nyngkong eh kiba hap ban shim ha u snem 2022, ïa kaba ngam shym la dei satia wat tang u dkhot jong ka ïingdorbar thawaiñ ka Jylla ha uto u snem”.
Haba kylli la ka dei ka jingkwah jingmyntoi shimet jongno re jongno na ka jingmih ban pyrshah, u Bah Paul u la ong, “Ngam ju sngewtynnad ban bishar ïa kino-kino ki briew. Ngam tip la ki la dep ban pule ïa baroh ki kot ki sla kiba donkam ne ka dei ba kila shah ïalam bakla. Hynrei kala don pat ka por, ka por kaba biang bha, ban phah ïa ki jingujor ne ïa kano kano ka jingujor kaba ki don”.
Haba pynksan ïa ka project Ropeway, u Bah Paul u la ong, “Hato phi tharai ba mano-mano kiba bat ïa ka kyrdan President jong ka India kin mynjur ban rung ne don jingïadei bad kano-kano ka projek kaban mih ka kynrum kynram? Ka nongshong shnong kaba nyngkong eh ha ka ri (President ka ri India), kala wan ban buh ïa u mawnongrim na ka bynta katei ka projek ka ban ïaid pyrshah ïa ki kyndon ïada ïa ka mariang?.
Halor ki jingkynthoh ba ka jingleit thung dieng bujli shawei kam lah ban bujli satia ïa ki dieng ba la pynkhyllem ha u Lum Shyllong, u la ong, “Da kaba ïaid thik pa thik la leh ïa kiei-kiei baroh. Nga ïohi ha ki kot khubor ba ym shym la don mano-mano ruh na ka Sorkar kiba kloi ban kren, ka dei tang kata ka jingeh. Nga ju ïai pyrkhat, nga ïai kren bad nga ïakren ruh mynta bad phi. Kumta nga tharai hangno ka don kum katei ka jingduna jong ka jingïakren”.
