Shillong, Risaw 15
U Bah Pius Marwein uba dei u MLA na Ranikor Constituency bad MDC na Langrin Constituency u la ong haba u la rung sha ka BJP kum u MLA ym da donkam shuh ban pyntip sha u Shongknor namar haduh mynta ha Khasi Hills Autonomous District Council (KHADC) ym pat don aiñ ban phet na kawei ka seng sha kawei pat.
Haba ïakren bad u nongthoh khubor hadien ba la wai ka dorbar KHADC, u Bah Pius Marwein u la pynpaw ka jingbym sngewïahap ïa ka jingkren u Shongknor u Bah Strongpillar Kharjana bad ïa u Chief Executive Member ka KHADC namar ki pyndonkam ïa ka ktien ba u dei u MLA ka BJP bad kum u MDC ka UDP.
“Haduh mynta ha KHADC ym pat don aiñ ban phet na kawei ka seng sha kawei pat, ngi lah beit ban rung sha kano-kano ka seng hynrei lada ki kwah ban nym shah ban phet sha kawei ka seng dei ban thaw shwa ïa ka aiñ” u la ong.
U la ong biang haba kum u MLA u la rung sha ka BJP, kaba mut ba u MDC ruh u la rung lang namar u la bat ar tylli ki kam.
U la pynkynmaw ba ha ki snem ba la dep ki bun ki MDC kiba kynthih na kawei ka seng sha kawei pat hynrei ym donkam ïa ki ban da pyntip.
Haba kylli la u MDC ka Shella u Bah Barikupar Synrem u la rung lang sha ka BJP ne u dang dei u MDC UDP haba u MLA ka Shella Constituency Bah Balajied Synrem uba dei u hynmen u la dep rung sha ka BJP, u Bah Pius u la ong ba haduh mynta um lah ban tip namar ki tip tang ïalade bad ïa u Bah Synshar Lyngdoh Thabah uba dei u MLA bad MDC na Sohiong Constituency uba la dep rung sha ka BJP.
Halor ka jingslem u Lamphang ka ïingdorbar ban ai jubab ïa ki phra ngut ki MLA kiba la rung sha ka BJP, u Bah Pius u kyrmen ba u Lamphang un sa ai ïa ka rai namar ma ki ruh ki la dep rung sha ka BJP.
U la ïathuh ba ka jingleit mih ki phra ngut ki MLA sha kamra u Lamphang ka dei namar naduh ba ki la ai shithi ban rung sha ka BJP ki khlem pat ïakynduh namar u khlem don ha Shillong.
