Shillong, Risaw 15
U Myntri Rangbah ka Jylla u Conrad K. Sangma ha ka sngi Palei, u la batai ïa ka jingthmu ba jngai jong ka Sorkar Jylla na ka bynta ka Nongbah Shillong, da kaba pynpaw ïa ki jingthmu ban pynduna ïa ka jingkhapngiah kali, bad ban pynkhlaiñ ïa ka kam sengkam sengjam, katba ka Rilbong ka rakhe ïa ka jingdap 100 snem jong ka.
Haba kren ha kane ka jingrakhe shispah snem, u Conrad Sangma u la ong ba ka Sorkar ka dang pynkhreh na ka bynta ka Nongbah Shillong, da kaba pynleit jingmut ha kaba pynbha ïa ki jingtei, ka synshar khadar bad ka jinglong jingman baroh kawei jong ki paidbah nongshong shnong bad ruh ki nongjngohkai pyrthei.
“Ka Sorkar kam trei marwei, hynrei ka trei bad ki paidbah ryngkat,” ong u Conrad bad bynrap ba ka jingïashim bynta jong ki paidbah kadei kawei na ki lad kiba treikam bha ban wanrah ïa ka jingkylla kaba don jingmut ha ka Nongbah.
Halor ki jingtei ha Nongbah Shillong, u Myntri Rangbah u la ong ba la khmih lynti ba ka ‘State Secretariat’ kan kynriah noh sha ka jaka thymmai jong ka, ha Umsawli ha kaba kut jong u snem ban wan. Nangta yn pyndonkam ïa ka Secretariat kaba la don lypa na ka bynta ban pynheh ïa ki surok, ki lynti ïaid kjat bad ban pynitynnad, khlem da pynthut ïa ki jingtei kiba la dep don lypa.
U la ong ruh ba ïa ka ïingdorbar ba rim yn pyndonkam biang, hadien ba ka ïingdorbar ba thymmai ka la dep ha kine ki bnai ban wan. Yn pynbha shuwa ïa katei ka jaka bad ban pynbiang ki jaka ïeng kali, ki jaka rung jaka mih, bad kiwei-kiwei de ki jaka ba la buh kyrpang na ka bynta ki taksi bad ki bos.
Kine ki sienjam, u la ong, ki long ban weng ïa ka jingkhapngiah kali ha Shillong.
Haba pynpaw ïa ka jingpyrshang jong ka Sorkar ban kyntiew ïa ki kam khaïi pateng, u Conrad u la kdew ïa ka jaka ha ‘Mawdiangdiang Pavilion’ kaba dang shu plie dang shen, da kaba batai ba ka long kaba kham bha palat. U la ong ba ïa kane ka jaka la shna khnang ban pyni ïa ki mar ba la shna da ki nongseng kam lajong, kynthup ïa ki ‘ice cream’ ba la pynmih da kaba pyndonkam ïa ki soh jong ka Meghalaya bad kiwei-kiwei ki mar ba la shna na la ka jong ka ri, u kophi ba la thung, ki mar bam bad ki waiñ ruh kumjuh.
Manla ka dukan ha katei ka ‘Pavilion’, la ai sha u wei u pa u wei u nongseng kam seng jam, u la ong, da kaba bynrap ba katei ka jingthmu ka long ban pynlong ïa ka ïew kaba khlaiñ na ka bynta ki mar rep ba la shna ha la ka jong ka ri bad ban pynmih ki lad ki lynti na ka bynta ki samla ka Jylla.
Ka Sorkar ka thmu ban leh kumjuh ïa kane ha kiwei pat ki jaka, kynthup ïa ka projek ka ban sa wan ha Polo, ka jingpynbha thymmai ïa ka jaka shongdie jingdie ki paidbah, bad ka Unity Mall ha Umsawli, nalor kiwei kiwei ki jaka ha kylleng ka Jylla Meghalaya.
U Conrad u la ong ba ki jingthmu ki dei shi bynta jong ka jingpyrshang ban pynïasoh lang ïa ka kam pynroi bad ka jingkyntiew ïa ka kam jngohkai pyrthei bad ki lad kamai na ka bynta ki nongseng kam seng jam.
“Ngim peit tang ïa ka snem ban wan ne ïa ki ar snem ban wan. Ka jingthmu jong ngi kan ïaid shaduh 50 snem bad 100 snem,” u la ong, da kaba kyntu ïa ki shnong kum ka Rilbong, ban thmu kumjuh ïa ki jingthmu pynroi jong ki, na ka bynta ki phew snem ban wan.
Nalor ki jingtei, u Conrad K. Sangma u la ong ba ka Sorkar ka pynleit jingmut ha ka kam jngohkai pyrthei, ka rep ka riang, ka koit ka khiah bad ka pule puthi. U la ban jur ba ki jingpynbha ha ka pule puthi, ki dei ban donkam ha ka jingnang jingstad.
Da kaba kam ba ki jingpynkylla ha ka roi ka par bad ka synshar khadar ki shim por, u Conrad u la ong ba kawei na ki jingeh na ka bynta kano-kano ka Sorkar ka long ban jop ïa ka jingpyrshah bad ban wanrah ïa ka jingkyrshan ki paidbah na ka bynta ki jingthmu ba thymmai jong ka.
Ka jingrakhe dap shispah snem jong ka Rilbong naduh ba la seng ïa ka bad ka jingnoh synñiang jong ki riew pawkhmat kiba la ïarap ban pynitynnad bad pynwandur ïa ka Nongbah Shillong bad ka Jylla Meghalaya ha ki bynta bapher-bapher.
