Shillong, Risaw 15
U Chief Executive Member ka KHADC u Bah Winston Tony Lyngdoh u la ong ïa u Bah Pius Marwein ba u dei u MLA ka BJP bad ha ka juh ka por u MDC ka UDP lada don kano-kano ka jingujor halor ka jingbym ïohlad ban khrong khajna lyngba ki khyrdop ba la buh ka Executive Committee ha Constituency jong u, u dei ban wan pyntip khnang ban pynbeit ïa kata ka jingeh.
Kane ka jingkren u Bah Winston ka dei halor ka jingkylli bynrap ba la wanrah da u Bah Pius Marwein u MDC ka Langrin Constituency ha ki kynta kylli jingkylli halor ka jingbym treikam ki khyrdop lum khajna kaba la long mynta ka sngi.
U Bah Pius u la pyntip ba ki khyrdop lum pisa ba la pynïeng ha Bakli bad Borsora kim shym la treikam wat haba la dep siew ka pisa kane ka pyni ïa ka jingïalam bakla ka EC.
Na ka liang u Bah Winston u la ong ba lada kita kiba shim wai kim lah ban lum khajna ki dei ban wan pyntip khnang ban pynbeit ïa kata ka jingeh hynrei haduh mynta ym don kum kata ka jingujor.
Kumta u Bah Pius u la ïeng biang ban ong ba halor kaei ka nongrim ba u CEM un ong ba u dei u MLA ka BJP bad kum u MDC ka UDP?.
Ha kawei pat ka kynta kylli jingkylli, u MDC na Mairang-Nongkhlaw Constituency Bah Equator Nongrang u la pyntip ba ka jaka sah ki MDC kaba don hadien ka ophis ka Khasi Hills Autonomous District Council ki la bun satang ki khnai kiba heh bad wat ban leit paiñkhana ruh hap kup shatri namar ka jaw um.
Kane ka jingwan pyntip u Bah Equator ka dei ha ka kynta kylli jingkylli namar u kwah ban tip haduh katno la pynlut ban maramot ïa ka MDC hostel.
Na ka liang u Bah Seiborlang Warbah uba dei u Executive Member ba dei peit ïa ka tnad pla pisa u la ïathuh ba la dep mang kumba 10 lak ban maramot ïa ka MDC hostel bad u kyrmen ba naduh u bnai Naiwieng yn ym don khnai shuh.
