Shillong, Risaw 15
Hadien ba la kut ka lai sngi ka jingshim ‘Mass Casual Leave’ jong ki nonghikai skul kiba don hapoh ka shatri jong ka Khasi Jaiñtia Deficit School Teachers’ Association (KJDSTA) ki la pynpaw ïa ka jingbymhun ïa ka jingleh jong ka Sorkar haba ïadei ki jingdawa jong ki.
“Kane ka rukom leh jong ka Sorkar Jylla bad ka tnad pule puthi ka pynpaw shai kdar ba kam don jingshimkhia eiei ruh haba ïadei ki jingdawa jong ki nonghikai bad ki nongtrei kiba don hapoh ka Deficit System, ki jingkular jong ka Sorkar kim shym la wanrah kano-kano ka jingpynbeit ka ban ai jinghun ïa ngi” ong ka kyrwoh jong u Babu Boswell Pala u ba long u President ka KJDSTA.
U la ïathuh ba ka kynhun la kumba shisnem mynta ka la pyrshang ban ïoh ka lad ban pynshai ïa ki jingeh jong ki ha u Myntri Rangbah ka Jylla, hynrei kam shym la ïoh lad haduh mynta ban pynshai ïa kine kiei-kiei.
U Babu Boswell u la pynpaw ruh ba ki jingsngewkhia ïa ki jingduhnong jong ki nonghikai katba nang mih ki sngi ki por, khamtam lei ba don ki nonghikai kiba la shongthait noh na ka kam. katkum ka jingong jong u, ki nonghikai kim ïoh ïa ka burom bad ka jingsuk ha ka jingim hadien ka jingshakri ba ki la aiti met bad mynsiem ha ka pule puthi.
“Ngim sngewtynnad ban shu ïakynduh bad shu ïa dih sha bad u Myntri Rangbah ka Jylla. Ngi kwah ka jingpynbeit haba ïadei ki jingeh jong ngi” u la ong.
Shuh-shuh u la ong ruh ba ka kynhun ka ïeng skhem ban ïada ïa ki hok jong ki nonghikai bad nongtrei, ïa kaba ki khynnah pule ki shaniah ha ka rukom treikam kaba ki la ïaleh katba lah ban tei ïa ka lawei ki khun samla ha ka imlang ka sahlang.
Haba pynpaw ïa ka rai jong ka jingïalang kaba la long ha ka 14 tarik Risaw 2026, u Babu Boswell u la ong ba ki nonghikai kin leit biang sha ki skul hadien ba la kut ka lai sngi, hynrei hadien jong ka Puja ka kynhun kan sa shong bishar ïa ki sienjam ban sa shim shakhmat.
