Shillong, Risaw 15
U Symbud Myntri Rangbah ka tnad Pynroi Sor Bah Sniawbhalang Dhar ha ka sngi Balang u la ong, ïa ki kam jong ka Polo Market Complex la dep ban aiti bad shen yn sa sdang pyntyllun noh ïa ka kam, katba ïa ka MTC Mall ha Khyndailad ka dei kaba la jam sha ka ban pyndep pura noh shen.
Haba ïakren bad ki nongthoh khubor, u Bah Dhar u la ong, ba u la dep ban pyllait ïa ka File ne ki kot ki sla kiba ïadei bad ka Polo Market. “Nga la dep ban mynjur ïa ka File bad ïa ka kam ruh la dep ban aiti. Lada kam don kano-kano ka jingpynkylla, ki kam kin sa sdang noh shen,” u la ong.
Halor ka MTC Shopping Complex ha Khyndailad, u Bah Dhar u la ong, kaba sah mynta ban tei, ka dei sa tang ki bynta kiba rit.
“Kila don tang katto katne ki kam kiba dang sah. Shisien ba la dep ban shna lut ïa baroh, ngin sa khot ïa ka EOI,” u la ong bad bynrap ba ïa kane ka kam la khmih lynti ban pyndep noh hapoh une u snem hi.
Shuh shuh u la ong, ba yn sa leit ban jurip khatduh hadien ba la dep ka ilekshon shiteng samoi jong ka MP Lok Sabha.
“Hadien ka ilekshon, ngan sa leit ban jurip na ka bynta ban pynbeit pura,” ong u Bah Dhar.
