Shillong, Risaw 15
Ka shnong Rilbong ha ka sngi Palei jong ka taïew, ka la rakhe ïa ka jingdap shispah snem jong ka, kaba pyni ïa ka histori jong ka thaiñ, ki jingnoh synñiang sha ka Nongbah Shillong bad ka Jylla Meghalaya.
U Myntri Rangbah ka Jylla u Conrad K. Sangma u la wan ban ïashim bynta ha kane ka jingrakhe kum u Kongsan, u Bah Sanbor Shullai, MLA ka thaiñ, kum u Symbud Kongsan.
Ha kane ka prokram, la don lang naduh ki nongïalam ha ka imlang sahlang, ki nongïalam saiñ hima sima, ki nongïoh khusnam, ki nongshah khot sngewbha bad kiwei-kiwei de.
Haba pdiang sngewbha ïa kane ka jingïalang, u Manas Chaudhuri, President ka komiti, u la ong ba ka jingrakhe dap shispah snem, kadei ka lad ban pynleit jingmut halor ka jingïaid lynti jong ka Rilbong bad ban ithuh ïa ki riew shimet kiba la ïarap ban pynwandur ïa ka Nongbah Shillong kum ka Nongbah kaba don ïa ki jaidbynriew bapher-bapher.
U la ong ba la seng ïa ka Rilbong ha u snem 1925, ha kaba la sdang ban shong shnong ha u snem 1927. Haba batai ïa kane u Chaudhuri u la ong ba la pynneh ïa ka jingshong suk bad jingïatylli ha kane ka shnong da ki phew snem mynshuwa, kynthup ha ki por ba don ka jingkulmar ha Shillong.
U la bynrap ba ka jingrakhe ka thmu ban ithuh ïa ki jingnoh synñiang ki briew na shabar jong ka thaiñ bad ban pyrkhat ïa ka jingroi ka Shillong naduh ba la seng ïa ka hapoh ka jingsynshar jong ki phareng ha u snem 1864.
U Chaudhuri u la pynpaw ïa ka jingnoh synñiang ka Rilbong sha ki paidbah, da kaba kdew ba ka la pynmih ïa ki nongthaw aiñ, Myntri Sorkar, ki ophisar shipai, ki nonghikai bad kiwei-kiwei ki riew shemphang.
U Myntri Rangbah, u Conrad K. Sangma, u la ong ba ki riew shimet kiba shah pynkup burom mynta ka sngi, ki la pyni ïa ka jingsdang, ka jingkut jingmut bad ka jingaiti ban poi sha ka thong, wat hapdeng kiba bun ki jingeh.
U la ong ba ka jingshah pynkup burom ka long kum shibynta ban ithuh ïa ka kyrteng jong ki bad ka donkam ïa ki samla ban bud ïa ka lynti jong ki.
U Myntri Rangbah u la kyntu jur ba dei ban ithuh ïa baroh 25 ngut ki nongïoh khusnam.
U Bah Sanbor Shullai, MLA haba ai jingkren ha kane ka prokram rakhe 100 snem, u la pynpaw ïa ka jingkordor jong ka jingdap shispah snem bad ka jingnoh synñiang jong ka Rilbong sha ka imlang sahlang bad ka Nongbah Shillong.
Kum shi bynta jong kane ka jingrakhe, ka Sorkar Jylla ka la ai jingïarap pisa ba kot T.25 lak na ka Chief Minister’s Special Development Fund sha ka Rilbong Sanatan Hindu Dharma Sabha.
