Shillong, Risaw 15
Ka Joint Action Committee (JAC) pyrshah ïa ka Shillong Ropeway Project, ka la rai ban ïaid beit shakhmat ïa ka jingïakhih da kaba ïaid paidbah ha ka 17 tarik mynta u bnai, ban pyrshah ïa ka Project Shillong Ropeway, ha Laban.
Ïa kane ka rai, ka JAC ka la shim hadien ba wai ka jingïalang ba la khot da ka Commissioner Secretary ka Sorkar Jylla ka tnad Tourism, ka Kong RM Kurbah ha ka jingdonlang ki heh ophisar na ki tnad bapher-bapher kynthup ki nongïalam ka Joint Action Committee.
Haba kren sha ki lad pathai khubor ha Shillong Press Club, ki nongïalam ki la kren shai ba ïa ka jingïaid paidbah kin ïaid beit shakhmat.
Ki la ong ba u ‘Lum Shillong’ um dei tang jong ka Laban Pyllun, hynrei kadei jong ki paidbah nongshong shnong. Ki la pynpaw ruh ka jingsngew lyngngoh ba ïa katei ka projek mynta, ka dang ïaid shakhmat ban pyntrei, watla ki dang ïakhih pyrshah.
Kumta ki la ong ba kin sdang da ki jingïakhih ha ka 17 tarik bad lada ka Sorkar kam sngap kin sa shim pat da kiwei ki sienjam.
Ki nongïalam ka JAC, ki la ong ba watla ka Sorkar Jylla ka la khot ïa ka jingïakren hynrei na ka liang ka JAC kam pat weng satia ïa ka jingthmu ban pynlong ka jingïaid paidbah ha ka 17 tarik Risaw, namar ka JAC ka kwah hi ba ka Sorkar ka dei ban pyndam noh syndon ïa ka Shillong Ropeway Project.
Ki la ong ba ka JAC ka la pynbeit ban pynlong ka jingïaid paidbah na Laban Last Stop shaduh ka jaka ba pyntrei ïa ka Shillong Ropeway Project, ban pynpaw ka jingpyrshah ïa ka projek.
“Ka Shillong Ropeway Project, ka la pynjot ïa u ‘Lum Shillong’ da kaba pom pathar ïa ki dieng bad kane kan ktah ïa ki tyllong umbam um dih, ngim kwah ïa ka Shillong Ropeway Project, ngi kwah ïa u slap, ngi kwah ban pynneh ïa ki tyllong um” ki la pynpaw.
