Shillong, Risaw 16
U Bah Paul Lyngdoh uba dei u nongïalam ba rangbah jong ka UDP uba dei ruh u MLA jong ka West Shillong u la ong ba u la ïoh ïa ka jingtyrwa na baroh ar tylli ki seng saiñpyrthei, ka Bharatiya Janata Party (BJP) bad National People’s Party (NPP), katba ki nongïa-lam napoh ka konstitwensi jong u ki la aiti ha u ïa ka rai ba khatduh ban jied napdeng kitei ki seng saiñpyrthei.
“Ki la don kiba pynsngewthuh na baroh ar tylli ki kynhun. Nga dang bishar bniah bha ïa uwei pa uwei na kita,” la ong u Bah Paul ha ki nongthoh khubor haba kylli hato u sngewtynnad ban ïasoh bad ka BJP ne ka NPP.
U la ong ba ki nongkyrshan jong u ha baroh ki kwah ba un shim ïa ka rai kaba khatduh.
“Nga la don ka jingïa-kren bad ki nongïalam jong ka konstitwensi jong nga naduh kiba hakhmat haduh kiba kyrshan ha ki shnong kiba la ai jingmut, ba kin iehnoh ïa ka rai ba khatduh ha nga bad kin burom ïa kano-kano ka rai namar baroh shilynter ki ju jied ïa nga kum u nongïalam jong ki ym kum u dkhot jong kano-kano ka seng saiñpyrthei,” u la ong.
U Bah Paul u la ong ba ka sienjam kaba hadien jong u bad ka lawei jong ka UDP kan shong ha ka rai jong u Lamphang halor ka dorkhas pyrshah ïa ki 8 ngut ki MLA barim ka UDP kiba la pynïasoh sha ka BJP.
“Kaba bun kan shong ha ka rai kaba u Lamphang un ai katkum ka jingujor ba la ai da ka UDP. Kumba u Lamphang u la ong ha kine ki ar sngi mynshwa, ba u dang bishar bniah ïa kane ka kam, kumta ngi khmih lynti ban tip ïa ka rai jong u Lamphang,” u la ong.
U la kdew ba ki 8 ngut ki MLA ki la pan jingithuh kum ki dkhot ka BJP hapoh ka aiñ kyntiap seng (Tenth Schedule) hadien ba ki la mih noh na ka UDP.
“Ki don shibun kiei-kiei kiba hap ban shimkhia da kaba pynshong nongrim ha ka hukum kaba yn sa pynmih da u Lamphang, nangta ngan sa tip kaei ka bynta kaba khatduh, kumno kiei-kiei ki ïeng bad nangta ngan shim ïa ka rai kaba khatduh,” u la bynrap.
Haba kylli hato u la kyntait ne em ïa ka Congress bad ka KHNAM, u Bah Paul u la ong ba um shym la kyntait eiei.
