Shillong, Risaw 16
Ka Hynñiewtrep Integrated Territorial Organisation (HITO), lyngba u Working President jong ka East Khasi Hills District, ha ka sngi Thohdieng ka la ujor da ka ejahar ha Mawlai Police Station, halor ka jingjia kylla jong kawei ka trok kaba don ïa u Registration Number NL 0A J 1926, kaba la suba ba ka kit dewïong be-aiñ bad kaba la kylla ha Ryndang Briew, Mawlai.
Ha ka jingujor, ka HITO ka la pynpaw ïa ka jingsngewkhia halor ka jingbym ïohi shuh ïa ka ‘chassis’ jong kane ka trok ha syndah jong ka jaka ba ka kylla, kaba la pynmih ïa ka jingartatien halor ka jingjah jong ka ‘chassis’ bad ka jingdonkam ban tohkit bniah ïa kane ka kam.
Hadien ba ka HITO ka la dep buh ehajar, la ïoh jingtip na ki katto-katne ngut ki paidbah ba don kawei ka kali kaba la kynnoh ba ka la shah ot noh ïa ka bynta jong ka kali bad kaba kit ïa u dewïong ha ka jaka ICAR, Umroi.
Kane ka jingtip ka la pynmih ïa ka jingdonkam ban pynlong ïa ka jingtohkit kaba bniah ban lap ïa ka jingshisha, kynthup ïa ka jingpynshisha la kane ka kali ka don jingïadei ne em bad ka trok kaba la kylla ha Mawlai.
Ka HITO ka kyntu ïa ka tnad pulit ban pynlong ïa ka jingtohkit kaba khlem shiliang khmat, ban wad ïa ka ‘chassis’ bad ki bynta ba jah jong ka trok, ban pynshisha ïa ki kot ki sla jong u dewïong bad ka kali, bad ban shim ïa ki sienjam katkum ka aiñ, lada lap ïa kino-kino ki kam be-aiñ.
Ka HITO ka pynpaw ba ka jingthmu jong ka, ka long ban ïada ïa ka hok bad ban kyrshan ïa ka jingpyntreikam ïa ka aiñ. Ka seng kan buddien ïa kane ka kam haduh ban da lap ïa ka jingshisha.
