Shillong, Risaw 16
Ka Shillong Bar Association bad ka High Court of Meghalaya Bar Association, ki la rai ban pynjur ïa ka jingïakhih jong ki, pyrshah ïa jingbym shimkhia jong ka Sorkar ba la ïalam u Conrad K Sangma halor ka jingdawa jong ki, ban weng noh ïa u Advocate General, u Amit Kumar, ha kajuh ka por kin leit tied jingkhang ha Ïingbishar.
Kine ki ar tylli ki Bar ki la mudui da ka PIL ban phah tuklar ïa ka jingpynbna ka Sorkar Jylla ha ka 16 tarik Nailur, kaba pyntreikam ïa ka Meghalaya Panel Advocate (Empanelment & Engagement) Guidelines, 2026.
Haba pynshai sha ki lad pathai khubor halor ka rai ba la shim da ka General Body Meeting ha ka sngi Thohdieng, u Assistant Secretary ka Shillong Bar Association u N Shyambor Singh Marpan u la ong ba ki dkhot ki ïahap jingmut lang ban bteng ïa ka jingïakhih.
“Ngi la khot ïa ka jingïalang jong ka kynhun, ban pyntip shaphang ka jinglong jingman bad haduh katno ngi la ïaid shaphrang bad ka jingïakhih. Ngi la sngap ïa baroh ki dkhot, ba kumno ka jingïakhih kadei ban ïaid. La rai da kawei ka jingmut ba ngin bteng beit,” u la ong.
U N Shyambor Singh Marpan u la ong ba ka Bar, ka la ïakynduh nyngkong eh ïa u Symbud Myntri Rangbah ha ka 2 tarik Nailur, uba la pynthikna ba u AG, Amit Kumar un ym wan ha Kashari haduh ar taïew bad la pynthikna ruh halor kane.
“Shuwa ban kut ka por, u Myntri Rangbah ka Jylla u la khot ïa ngi sha ïingsah jong u ha ka 16 tarik u Nailur bad kajuh ka sur u la ong, ba un sa peit bniah ïa kane ka kam. U la pan por ar taïew haduh ka 07 tarik u Risaw. Ngi la mynjur,” u la ong.
“Hadien ka 16 tarik u Nailur, u Amit Kumar u la mih ym tang ha High Court hynrei ha kiwei pat ki Ïingbishar ruh, da kaba pynkheiñ ïa ka jingïapynbeit ba la pynbeit bad u Myntri Rangbah bad ma ngi. Kumta ha ka 30 tarik u Nailur, ngi la khot ïa ka jingïalang bad rai ban ïakhun pyrshah biang,” ong u N Shyambor Singh Marpan.
U la ong ba ka Sorkar ha kajuh ka sngi jong ka jingïalang ba la khot u Myntri Rangbah ki la ïakren halor kane ka kam.
“Ngi la tip hadien, ba ha ka 16 tarik u Nailur, hi ka Sorkar ka la pynbna ïa ka Meghalaya Panel Advocate Guidelines, 2026. Lada phi ïaid lyngba kane, ka ai bor bha ïa u AG ban weng ïa uno-uno na ka kynhun. Ngim tip ïa ka jingthmu halor kane,” la ong u N Shyambor Singh Marpan.
Ka PIL, kaba la mudui ha kine ar sngi ba la dep, ka kwah ban pynduh noh ïa katei ka jingpynbna bad ban buh ïa ka rukom treikam kaba hok, kaba shai, kaba pynshong nongrim ha ka jinglah jong ki nongïasaid aiñ ka Jylla. Ka wad ruh ïa ki jingtip halor ka aplikeshon RTI, ba la ai ha ka 10 tarik u Nailar, 2026.
Na ka liang u Secretary ka Shillong Bar Association, u Bah T.L Jyrwa u la ong ba ka jingsngewsih bad bitar kaba la pynbor ïa ki Bar ban sangeh treikam.
“U wei u briew u lah ban thung bad pyndonkam bakla ïa ka kam, da kaba kyntait noh ïa ka jingtbit bad ka jingdon ki nongïasaid aiñ na ka Jylla ban thung ha ka kam,” u la ong.
U la ong ba ha ka 09 tarik u Risaw, ka komiti ba ïatreilang na baroh ar ki Bar, ki la rai ban pynpher noh ïa ka rukom pynlong jingïakhih.
Shuh shuh u la ong ba ïa ka bynta kaba bud jong ka jingïakhih, yn sa pynbna hadien ka shuti Puja, ynda la plie biang ïa ki Ïingbishar.
“Ka High Court kan don ha ka shuti Puja baroh shi taïew bad ki District Court na ka bynta ar-lai sngi. Hadien kata ngin pynlong biang ïa ka jingïakhih da kaba tyngeh,” u la bynrap.
