Shillong, Risaw 18
Ka Meghalaya Schools Welfare Development Association(MSWDA) ka pyntip ba ha ka 20 tarik Risaw 2026 (Sngi Ba-ar) kan don ka jingïalangbah (General Meeting) jong ki skul Aided & Unaided kiba hap hapoh ki District jong ka Khasi-Jaintia Hills, ka ban sdang naduh ka por 11:30 mynstep ha Khasi National Dorbar Hall, Shillong.
Katkum ka jingpyntip lyngba u Bah H. M. Marbaniang President MSWDA ha kane ka jingïalangbah ki mat ba hakhmat tam eh ba kan ïathir-ïatai kan long halor ka Memorandum sha ka Department of School Education and Literacy, sha ka Ministry of Education jong ka Sorkar, haba ïadei ka National Education Policy (NEP), ka jingpynkhlaiñ ïa ka kyrdan pule ba nyngkong (Foundational Stage), ka jingdonkam ban pynbiang ïa ki jingtei bad ki jingdonkam ha ki skul (School Infrastructure) bad ka jingdonkam ban pynjem ïa ki kyndon jong ka Pupil-Teacher Ratio (PTR) hapoh ka Right of Children to Free and Compulsory Education Act (RTE Act, 2009) kyrpang ïa ka Jylla Meghalaya.
Shuh-shuh nalor kine ka MSWDA kan ïakren ïatai ruh haba ïadei ka Notified List bad Enrolment Criteria, ka Uniform Grant bad Composite School Grant na ka bynta baroh ki khynnah skul bad ki skul, ka PM-POSHAN Scheme, ki jingeh ba ki mat kiba ïadei ki skul Permitted/Recognised Unaided LP bad UP Schools, ka CM-Impact Plus Grant-in-Aid Scheme na ka bynta ki Secondary & Higher Secondary Schools.
Kumta ka Association ka khot ïa wer ban kyrpad ïa ki President, Secretary, Principal, Headmaster, Headmistress, Head Teacher, ki dkhot SMC bad baroh ki Assistant Teachers jong ki skul kiba don ha kylleng ka Khasi-Jaintia ban shimkhia ban wan ban ïashim ha kane ka jingïalangbah.
