Shillong, Risaw 18
Kawei ka Longkmie bad uwei u Rangbah na ka shnong Sohmylleng bad Banglasohphie, ki la pynpaw ka jingsngewdiaw ba u Public Information Officer (PIO) ka ophis u Syiem ka Hima Nongkhlaw, u pynslem ban ai jubab ïa kaba RTI kaba ki la pan jingpynshai halor ka synshar khadar bad ki kot ki sla jong ki jaka puta ka shnong Sohmylleng.
Haba kren sha ki nongthoh khubor, ka Kong Dreamlet Warjri kaba dei ka nongwad RTI ka la ong ba ka jingpan RTI ïa ka synshar khadar, ka long ban tip la ka shnong Sohmylleng bad Lawkanoh ka hap ha Hima Sohïong ne Hima Nongkhlaw.
Ka Kong Dreamlet ka la ong ba ka jingpan RTI jong ki, ka long namar ba ki paidbah ki kulmar ïa ka jingdon ar ngut ki nongsynshar ha ka shnong bad kumta ki kwah ban tip ïa ka jingshisha.
Ka Kong Dreamlet ka la pynpaw ka jingsngew bitar ba u PIO u ba dei u Syiem Khynnah ka Hima Nongkhlaw, u la pynslem ban ai ïa ka jubab kaba la palat ïa ka 30 sngi, ha kaba ki la ujor noh sha ka Appealate Authority jong ka KHADC ban ïarap ïa ki ban ïoh ïa ka jingpynshai.
Shuh-shuh ka la ïathuh ba hadien ba ka Appeallate Authority ka la pan jingpynshai bad la buh ruh ïa u PIO ban wan sha ka Hearing, hynrei u la aidaw ba u pang bad um lah ban wan ban ai ka jingpynshai. “Ngim don kano-kano ka jingpyrshah ïano-ïano ruh, hynrei ngi shu kwah ïa ka jingpynshisha, hato ka shnong Sohmylleng ka hap hapoh jong kano ka Hima” ka la ong.
Ka Kong Dreamlet ka la ong, watla ka Hima Nongkhlaw kam shym la lah ban ai ka jubab kaba shai, hynrei kumba ka paw na ki kot ki sla katkum ka AD Rule jong ka KHADC ka shnong Sohmylleng ka hap hapoh ka Hima Sohïong Lyngdohship.
