Mairang, Risaw 18
Ha ka sngi Saitjaiñ jong ka taiew, ka Mawkyllei College kala ïoh ban rakhe ïa ka jingdap 15 snem jong ka kolej ha ka jingshakri jong ka ïa ki samla ha ka ban phriang ïa ka jingnang jingstad.
Ïa kane ka jingrakhe la pynlong hakhmat ka ïingskul ha Mawkyllei Eastern West Khasi Hills District bad lah ban kdew ba ïa kane ka kolej la seng ha u snem 2011 ban sam ïa ka jingnang jingstad sha ki samla ki khynnah skul na kane ka dong ka thaiñ bad kane ka kolej ka dei ruh tang kawei kaba don ha ka Mawthadraishan Block.
Ha kane ka jingrakhe, u Myntri Rangbah ka jylla u Conrad K Sangma u la long kum u kongsan ha ka jingïadon lang u MLA ka Mawthadraishan u Bah Shakliar Warjri, ka Deputy Commissioner ka Kong Anita Kharpor, u SP lem bad kiwei ki ophisar bad kiba shah khot sngewbha ha ryngkat ki nonghikai bad ki khynnah skul.
U Myntri Rangbah haba ai jingkren ha kane ka jingrakhe u la ai ka jingainguh ïa U Blei ba u la pynlong ïa kane ka kolej ban ïaid beit ïaid ryntih bad kot sha ka jingdap khadsan snem.
Shuh shuh u la pynpaw ruh ïa ka jingsngewnguh ïa u Bah Hopingstone Lyngdoh (bam kwai ha dwar U Blei), uba dei u nongthaw bad u nongseng jong kane ka kolej, uba la long ruh u nongïalam ba pawkhmat jong ka jylla.
U Myntri Rangbah u la pynshong nongrim ba ka pule puthi ka long u mawnongrim uba kongsan tam ha ka imlang sahlang ban kyntiew ïa ka roi ka par.
Ha katei ka sngi kaba kyrpang, u Myntri Rangbah u la pynbna ïa ka jingïarap pisa kaba T.30 lak na ka bynta ka kolej, kumjuh ruh u la pynbna ban pyllait T.3.5 klur na ka bynta ban shna ïa ki surok hapoh ka shnong Mawkyllei.
