Shillong, Risaw 19
Ka Meghalaya Unified Teachers Association (MUTA) kan pynlong ïa ka jingïalang bah ha Madan Student, Jaïaw ha ka 24 tarik u Risaw, ban ïakren halor ki mat jingdawa ba kongsan ban pynrung ïa ki nonghikai SPF hapoh ka ‘Sixth Pay Commission’ nalor kiwei-kiwei ki kyndon ba ïadei bad ka jingshakri.
Ka MUTA, ka kynhun ki nonghikai ba la pynïasoh lang hapoh ka Structured Pay Framework (SPF), ka khot ka wer ïa baroh ki nonghikai SSA (Lower Primary & Upper Primary), nonghikai RMSA (Secondary & Higher Secondary), ki nonghikai Adhoc (Lower Primary, Upper Primary, Secondary, Higher Secondary & Secondary Morning/Night) bad ki nonghikai ba 4 (SSA Upper Primary School) sha ka jingïalang.
Ka jingïalang kan ïakren halor ki jingdawa (Charter Core Demands) ba la pynsngew sha ka Sorkar ha ki ar tylli ki jingïalang ba dang shen – bad ka tnad pule-puthi ha ka 16 tarik u Nailur bad u Myntri Rangbah ka Jylla, u Conrad K. Sangma ha ka 13 tarik u Risaw, 2026.
Ki jingdawa ki kynthup ïa ka jingpynrung lang ïa ki nonghikai SPF hapoh ka ‘Sixth State Pay Commission’, ban pynbna ïa ki ‘Service Condition’ sha ki nonghikai SPF (ka hok shim shuti ba ryntih bad ki jingmyntoi ha ka por ba armet, ki jingmyntoi ha ka koit ka khiah bad ka jingsiew biang ïa kaba la pynlut ha ka por ba pang ba shitom ne ka ‘medical reimbursement’, ki bynta jong ki ram bad ki jingmyntoi na ka sut, bad ka song kyrpang ba shisien na ka bynta ki nonghikai ba rangbah bad ka siensiew ba shisien (ba pura), ka jingpyllait ïa ka tulop na ka bynta ki nonghikai SSA bad RMSA.
Ka seng ka la kyrpad ruh na ka bynta ban pynbeit ryntih ïa ki rukom treikam ha ka liang ka pisa-tyngka khnang ban pyntikna ba ïa ka tulop la “pyllait beit na ka por sha ka por bad khlem da pynslem man la u bnai hapoh ka Sngi ba Nyngkong jong man la u bnai.”
Ka MUTA ka la ong ba kane ka jingïalang kan pynshai ruh ïa ki nongrim bad ki jingthmu ba sha lyndet – balei la thaw ïa ka seng bad kan pynkhlaiñ ruh ïa ka jingïatylli hapdeng ki nonghikai SPF.
“Kane ka jingïalang ka long kaba kongsan bha na ka bynta ka lawei jong ngi baroh. Ngi kyntu jur ïa iwei-pa-iwei i nonghikai hapoh ka ‘Structured Pay Framework’ [SPF] ban pyllait por bad ban wan khnang-khnang sha kane ka jingïalang,” la ong ka seng.
