Shillong, Risaw 19
Ki pulit ka Jylla ki la rai ban pynjur ïa ka jingpahara bad ka jingpeitngor ha kylleng ka nongbah ha ka por jong ka ‘Durga Puja’, da kaba pynjlan shuh-shuh ïa ka jingpahara miet naduh ka por 12 baje shiteng synñia haduh ka por 6 baje mynstep.
U SP ‘in-charge’ Traffic ka East Khasi Hills, u Hari Prasath M.R. ha ka Lah Sngi U Blei u la ong ba kane ka rai ka la long hadien ka jingïalang bad ka Central Puja Committee (CPC) ba la pynïaid da u Chief Secretary ka Jylla ha ryngkat ka jingdon lang ka DGP.
“Da kaba pynshong nongrim ha ki jingai jingtip na ka CPC, ngi la rai ban pynjur ïa ka jingpahara, baroh ar – ka jingpahara da ka kjat bad ki kali bad ngin pynjur ruh ïa ka jingtalasi, nalor ka jingpynjlan ïa ka por khamtam ha ki por mynmiet – naduh ka por 12 baje haduh ka por 5.30 ne 6 baje mynstep,” u la ong.
U la pyntip ruh ba la nang pynkhlaiñ shuh-shuh ïa ki bor pulit ha ki jaka ba hap ban phikir bad ba i-don jingma.
“Ngi la pynjlan ïa ka por pahara bad ngi dang lum shuh-shuh ïa ki bor pulit ha ki jaka ba hap ban kham phikir,” u la bynrap.
Halor ka jingjia suba kawang ‘petrol bomb’ ha Mawbah, u SP u la ong ba ka jingtohkit ka dang ïaid shakhmat.
“Ngi dang tohkit ïa kane. Ka jingtohkit ka dang ïaid bad tang hadien ka jingtohkit kaba bniah yn sa lah ban tip ïa ki briew kiba donkti ha kane ka kam bad ngin sa lah ban leh eiei pyrshah ïa ki,” u la ong.
Da kaba pyntikna ba ka jinglong-jingman baroh kawei ka bit ka biang, u la ong, “Kiei-kiei baroh ki bit ki biang. Ki don katto-katne ki jingjia (stray incidents) kiba jia bad ban pyntikna ban long kiba husiar, ngi la nang pynjur ïa ka jingpahara jong ngi bad ngi nang pynbun ïa ka jingpeitngor jong ngi bad ym donkam ban khuslai ïa kiei-kiei.”
