Shillong, Risaw 19
Ka Sorkar Jylla kala pynbna ïa ka Meghalaya Electric Vehicle Policy, 2026, kaba tyrwa ïa ki lad jingïarap ha kaba ïadei bad ka jingthied, road tax bad ka jingmap ïa ka jingsiew ha ka ban register bad ki jingmyntoi ha ka ban pynduh (scrap-page) pynsted ïa ka jingpyndonkam ïa ki kali ki bym pynmih tdem.
Ka policy, ka ban treikam na ka bynta 3 snem bad ka ban bujli noh ïa ka Policy jong u snem 2021, kala wan ha ka por ba ka Jylla kala don kumba 6.53 lak tylli ki kali kiba la register kynthup ïa ki 2500 tylli ki kali ilektrik haduh u bnai Jylliew, 2026.
Hapoh kane ka policy, ki nongthied ki lah ban shim ïa ki subsidy katkum ka jingkloi ka jong ki ne kaba la tip kum ka “first-come, first-served basis”.
Na ka bynta ki thuk thuk ilektrik lada ka dor thied na ki karkhana ka long T.1.75 lak, ka lad jingïarap ka ban ai ka long 2000 tylli ïa kiba pyndonkam shimet bad 2000 kiba pyndonkam ha ka ban kamai kajih.
Katba ïa ki kali lai shaka kiba kynthup ïa ki Auto bad kiba kit jingkit (goods carriers) kin ïoh jingïarap 500 tylli.
Na ka bynta ki kali ilektrik saw shaka, lada ka dor thied ka long T.35 lak, ki riew shimet kiba thied kin ïoh jingïarap T.25,000 tang na ka bynta 3000 tylli ki kali, katba ki kali ban kamai kin ïoh T.50,000 na ka bynta haduh 3000 tylli ki kali.
Baroh ki kali ilektrik kiba lah register ha ka por jong katei ka policy kin ïoh ruh ïa ka jinglait siew ïa ka khajna kali bad ka bai register ïa ka kali kaban kynthup ïa ki ar shaka, lai shaka, saw shaka bad ki bos ilektrik.
Ka Sorkar kala wanrah ruh ïa ka ‘Scrap-page Incentives’ na ka bynta ki trai kiba phah pynduh noh ïa ki BS-IV bad ïa ki kali kiba kham hashwa ha ki Centre kiba la ïoh jingithuh.
Ka lad jingïarap ka long T.10,000 ïa ki ar shaka (na ka bynta ki 400 ngut kiba aplai kloi tam), T.25,000 ïa ki lai shaka (50 ngut kiba aplai), T.50,000 na ka bynta ki kali saw shaka jong ki riew shimet (300 ngut kiba aplai) bad T.2 lak na ka bynta ki kali saw shaka kiba kamai (300 ngut kiba aplai).
Ka policy ka buh ruh ïa ki lad ban tei ïa ki steshon kaba ki kali kin ïoh ban ‘Charge’ bad ban bujli ïa ki ‘Battery’ ha kylleng ki bynta jong ka Jylla da kaba ïatreilang bad ka MePDCL, Tourism, Urban Affairs, PWD bad kiwei-kiwei ki tnad Sorkar.
Ïa ka jaka Sorkar lah ruh ban ai ‘Lease’ na ka bynta ban tei ïa ki Charging Station na ka bynta ki paidbah, katba ïa ki jingtyrwa yn pynïaid lyngba ka Single Window System ha ka Portal jong ka Invest Meghalaya.
Ki nongkynshew tyngka ki lah ban shim ïa kitei ki lad jingmyntoi hapoh jong ka UNNATI 2024 bad MIIPP 2024 Scheme.
U Commissioner ka tnad Transport un dei u ‘Nodal Agency’ ban pyntreikam, katba ka State Level Committee ka ban khlieh da u ophisar uba la rangbah tam ha ka kyrdan Secretary, Transport un mynjur ïa ki jingai jingïarap, ban khmih bniah bad ban shimkhia ïa ki jingeh.
