Shillong, Risaw 19
U President ka Voice of the People Party (VPP), u Bah Ardent Miller Basaiawmoit u la pynpaw ba ka party kam ju plie ka jingkhang kat ïa uba wan pynïasoh namar ba don shibun kiba wan pynïasoh ha la ka jong ka jong ka rukom pyrkhat.
“Ngim kwah ba phin wan rung bad ka party bad ban mih noh,” la ong u Bah Ardent haba kren ha ka jingïalang pdiang ïa u Bah George Sun ban pynïasoh sha ka party.
“Ngi la kren shai ruh ïa u Bah George ba lada un wan pynïasoh sha ka party tang ban ïoh tiket ha ka ilekshon, ngin nym pdiang namar ba ngim kwah ruh ban shukor ïano-ïano ruh,” u la ong.
U Bah Ardent u la ïathuh ruh ba ka party bad u Bah George ki la dep ban ïakren la slem bha halor kane ka bynta, “Namar ngi kwah ban tip ba u Bah George u kwah pynïasoh sha ka party, kadei halor kiei ki nongrim, namar lada u kwah tang ban ïoh tiket, ka party kam pdiang satia, hynrei la ngewthuh ba u Bah George u kwah pynïasoh na ka bynta ka jingbha bad ka jingïohi jngai.”
“Da kaba ban biang ban pynthikna ba ha u snem 2028, ka VPP kan synshar ïa ka Jylla bad knieh noh ïa ka bor synshar. Ngi thikna ba na ka 36 ngut ki MLA ngin jop beit haduh 32 ngut khnang ban skhem ka rukom treikam ka party. Da kaba kdew ba ha District Council donkam 16 ngut ban synshar hynrei ka party ka la jop haduh 17, kaba mut ba kane ka dang pynskhem shuh shuh,” la ong u Bah Ardent.
Kumta u la pynshai ba ka party ka kwah ba ki paidbah kiba wan ban pynïasoh sha ka, ki dei ban ai ka jingkyrshan halor kita ki nongrim jong ka party, da kaba bynrap “Ngim khring ïa phi ki paidbah ban pynïasoh sha ka party, ba lada ym ïoh tiket phet noh na ka party, hynrei ngi kwah ka jingkylla ha u 2028, bad na Mawphlang kan sei u MLA na ka VPP”.
Haba ïadei bad ka ilekshon shiteng samoi sha Lok Sabha u Bah Ardent u la ong ba ka party kan jop donburom biang, hadien ka jingkhlad noh ba kyndit jong u (L) Dr. Ricky A.J Syngkon, uba dei uwei uba don bynta ban seng ïa ka party.
