Shillong, Risaw 19
U Bah Ardent Miller Basaiawmoit, President ka Voice of the People Party (VPP) u la pynpaw ba ka party ka ai ka jingkyrshan haba ïadei bad ka jingpyrshah ki longkmie ka Joint Action Committee Against Shillong Ropeway Project ïa ka jingshna ‘Ropeway’ ha u Lum Shillong.
Haba kren sha ki lad pathai khubor ha ka sngi Nyngkong jong ka taïew, u Bah Ardent u la ong ba ka jingleh ka Sorkar ban pynlong ïa ka ‘Public Hearing’ tang hapdeng ki nongïalam shnong, ka pyni ïa ka jingshukor.
“Lada ka Sorkar kan ïuhroit ïa kitei ki longkmie, ka party kan mih shakhmat ban ai ka jingkyrshan ïa ki,” u la ong.
U la kdew ruh, ba ka jingwan ki nongjngohkai pyrthei ha ka Jylla, ki wan namar ka jingdon ka mariang bad lada yn pynduh noh ïa ka, kan pynlong ïa ki ban nym wan ïuhkjat shuh sha ka Jylla.
“Ngi ngeit skhem ba kine ki longkmie kiba la ïeng ban pyrshah, kin nym kynran dien bad kin ïaid beit shakhmat bad ngi peit kaei ba ka Sorkar ka leh. Lada ka Sorkar hi ka pyrshang ban ïuhroit ïa ka jingïakhih jong ki longkmie, kan sa poi ka por ba ka party kan sa mih lang ryngkat bad kine ki longkmie,” la ong u Bah Ardent.
“Ngi khmih lynti ba ka Sorkar kan nym pynbor ba ka VPP kan mih surok lang ryngkat bad kine ki nongshong shnong ka Laban Pyllun,” u la bynrap.
“Haba ki paidbah ba bun ba lang kim pdiang, ka Sorkar ka dei ban pynkynriah ïa kane ka projek sha kiwei pat ki jaka, kumba ki nongshong shnong ki mih ban pynpaw pyrshah ïa kane ka projek,” ai jingmut u Bah Ardent sha ka Sorkar.
