Shillong, Risaw 19
Tang hadien katto katne kynta ba la mih ki khubor ba ki lai ngut ki MLA ka United Democratic Party (UDP) ki la pyntip sha u Lamphang ka Ïingdorbar Thawaiñ ka Jylla ba kin pynïasoh noh sha ka National People’s Party(NPP), ka UDP ka la shim ïa ka rai ban beh noh (Expel) ïa ki lai ngut ki MLA ka UDP kiba kynthup ïa u Bah Paul Lyngdoh MLA ka West Shillong, u Bah Renikton Lyngdoh Tongkhar MLA ka Mawkyrwat bad u Bah Nujorki Sungoh MLA ka Mowkaïaw Constituency.
Ha ka shithi ba la soi da u President jong ka UDP u Bah Metbah Lyngdoh, u la ong ba kane ka rai jong ka Party ka long hadien ba la mih ha ki lad pathai khubor kiba pyni ba ki lai ngut ki MLA ki la pynpaw ba ki thmu ban leit pynïasoh noh sha ka NPP bad kane ka rai kan treikam naduh ka 19 u Risaw 2026.
