Shillong, Risaw 19
Ka BJP 18-West Mandal, Shillong ka pynrem jur ïa ka jingkynnoh kawang petrol bom ïa kawei ka Fast-food bad ka jingthang ïa kawei ka arshaka ha Mawbah hapdeng ka jinglehkmen Durga Puja kaba dang ïaid shakhmat.
Katkum ka kyrwoh, u nongïalam ka BJP West Shillong Bah Mike Pakynteiñ u la ong, kum kine ki kam thombor, pyntieng pynsmiej bad pynjot ïa ki mar ki mata ki long kiba sngewkhia haduh katta katta bad kim don jaka shuh ha ka imlang sahlang kaba suk ba saiñ.
Ka long kaba sngewsih khamtam ba kine ki jingjia ki la jia ha ka por jong ka lehkmen kaba pyni ïa ka jingjop jong ka jingbha halor ka jingsniew bad kaba pynïasoh lang ïa ki briew ha ka mynsiem jong ka jingngeit bad ka jingïatylli ha ka imlang sahlang.
“Ngi pynpaw ïa ka jingsngewkhia na ka bynta ka bit ka biang jong ki nongshong shnong bad ki jaka khaïi ha Mawbah bad ngi ïeng ha ka jingïatylli bad baroh kiba shah ktah ha kine ki jingjia. Ym don uwei ruh kiba dei ban im ha ka jingtieng ïa kum kine ki kam bym pyrkhat bad ki kam beaiñ”, u la ong.
“Ngi kyntu ïa ki pulit ka Meghalaya ba kin pynlong ïa ka jingtohkit kaba bniah, kaba khlem shah liang bad kaba buh ban pyndep da ka por, ban ithuh ïa kiba donkti bad ban leh da ka tyngeh pyrshah ïa ki nongleh kam sniew. Ngi kyrpad ruh ïa ki bor ba dei peit ba kin pynkhlaiñ ïa ki lad jingïada ha katei ka thaiñ khnang ban ïada na kino-kino ki jingjia kiba sngewsih ha kane ka aiom lehkmen,” u la bynrap.
Ym dei ban ailad ba kum kine ki jingjia kin wanrah ka jingsheptieng, ban pynmih ïa ki jingïakynad ne ban pynthut ïa ka jingïatylli ha ka imlang sahlang ha Shillong bad ka Meghalaya, la ong ka kyrwoh.
