Shillong, Risaw 19
U MLA ka West Shillong Constituency u Bah Paul Lyngdoh u la pynpaw ba ki don bun ki daw kiba ka United Democratic Party (UDP) ka la shim ha ka ban pynkhlaiñ ïa ka party, hynrei kam shym la leh kumba la mynjur ha ka CEC, ïa kaba u la kdew ruh ïa ki jingbym ïaid beit shuh ki rukom treikam jong ka Party.
Haba kren sha ki nongthoh khubor u Bah Paul u la ong, hadien jong ka Ilekshon MP 2024 ka party lyngba ka CEC ka la shim ïa kawei ka rai ban pynkhlaiñ ïa ka party da kaba sdang ban leh ïa kane na nongbah Shillong, “Ka rai ba ka CEC ka jong ngi ka la shim ha kato ka por ba nga dang long u President jong ka UDP Shillong District, ka long ban pynkhie im biang ïa ka party bad ban sdang ïa kane na nongbah Shillong” u la ong.
“Hadien jong kane ka rai ngi la lum la lang ïa ki nongtrei jong ka party, wat ki longkmie kiba la don bynta ha ka ban ïakhun ban ïoh Hill State ruh, nalorkata la ai bor ruh ïa ngi ban pynïaid ïa ka sngi ba seng ïa ka UDP ka 11 tarik Nailur 2025, katba na rieh ki nongïalam ka UDP ki la phah jingthoh ba dei ban weng noh ïa u Bah Paul bad u Bah Kyrmen” u la ong.
Haba bynrap ïa ka jingphet jong ki 8 ngut sha kawei pat ka seng saiñpyrthei, u Bah Paul u la ong ba kam lah ban long ba ki phet khlem ki nongrim kiba biang, hynrei ka don ka nongrim, “ma ki, ki khlem kren kumba ma nga, nga kren lehse hynrei nga kren ïa phi da kaba shai,” u la ong.
Shuh-shuh u la kdew ba ka CEC ba ka UDP ka dang shu dep long ka la dei ban kren haba ïadei ka jingkut noh ka samoi treikam jong ki nongïalam jong ka party, “U President ba don mynta ha ka jingshisha ka jingtreikam jong u ka ladei ban kut, u General Secretary ruh u dei u Acting kumta yn ïakren yn ïatreikam kumno bad kata ka party” u la ong.
Haba kylli la ka don kano-kano ka jingbuh kyndon haba ïadei ka jingpynïasoh jong u sha ka NPP, u Bah Paul u la ïathuh ba khlem buh kano-kano ka kyndon, hynrei ka kyndon ba yn buh hakhmat eh kan long ban don ka jingïaburom ba markylliang.
