Shillong, Risaw 19
Ka Shillong All Faiths Forum (SAFF) ha ka Lah Sngi U Blei ka la khot la wer ban pynneh-pynsah ïa ka shong suk shong shngaiñ hadien ba la mih ki jingjia ba la leh da ki runar ha ka por ba dang ïaid ka ‘Durga Puja’ ha ka Jylla.
U President ka SAFF, u Most Rev Dr. Purely Lyngdoh u la ong ba ka kynhun ka sngewkhia shi kat dei bad sngewsih jur halor ki jingjia ba dang shu jia.
Haba pynrem ïa kitei ki jait kam, ka kynhun ka la ong ba kum kine ki jingpyrshang ki long ban pynthut ïa ka shongsuk shong shngaiñ kumjuh ïa ka jingïalong tylli kawei jong ki jaidbynriew hapoh Meghalaya.
“Kum kine ki kam ba la leh da ki runar, ki dei ka jingpyrshang ba la thmu ban pynthut ïa ka jingïatylli bad ka jinglong-jingman ka shongsuk shong shngaiñ jong ka Jylla jong ngi,” ong ka SAFF bad bynrap, “Ka Meghalaya ka la long barabor ka Jylla jong ka jingsuk ha kaba baroh ki jingngeit bad ki jaidbynriew ki ïa im-lang bad ki rakhe ïa ki jinglehniam jong iwei-pa-iwei da kaba burom bad ka jingïalong shipara.”
Ka kynhun ka la kyrpad ïa baroh ki nongshong shnong ban pynneh ïa ka jingïatylli bad ban ym ailad ïa ki khubor hamsaïa.
Na ka liang ka SAFF, ka la ong ba ka la kyrpad ïa ka Sorkar Jylla bad ki bor pynïaid distrik “ban shimkhia bad leh eiei mardor pyrshah ïa ki nongleh kam sniew bad ban pyntikna ïa ka jingïada kaba biang na ka bynta ka jingrakhe ba suk ba saiñ jong ka ‘Durga Puja’.”
“Ngi kyntu ruh ïa ki paidbah ba kim dei ban ngeit ïa ki khubor lamler bad ban ai ka jingïatreilang kaba pura bad ki bor ba dei khmih ha ka ban pynneh-pynsah ïa ka suk ka saiñ,” ka la bynrap.
