Shillong, Risaw 20
U Dr.Airpeace Rani, nongaiktien ka Voice of the People Party (VPP) u la ther tyngeh ïa ki MLA kiba la shet kylla ïa ka jingshaniah ki paidbah, kiba la pynjop ïa ki, na kiwei ki seng hynrei mynta ki leit phet sha kiwei pat ki seng.
Haba kren ha ka jingïalang pdiang burom ïa u Bah George Sun sha ka party, u Dr.Airpeace Rani u la ong ba ki MLA kiba phet seng ki la shet kylla ïa ka jingshaniah ki paidbah bad pynkylla kum ka jingdon jingem shimet bad ban lilam katba mon.
“Kum ka party ngi shim ba ka kam synshar khadar kadei ka kam ba kyntang, bad ka jingkyntang kaba mut ba ngi kheiñ kyntang ïa ka vote jong ki paidbah kiba ai. Ka vote kaba u paidbah u ai sha u kyrtong, kadei kaba u paidbah u ai ka jingshaniah,” u la ong.
Namarkata, ïa ka ‘Public Trust’ ki pynkylla long ‘Private Property’, ki ïa die ïa ka, katba ki mon, la ther tyngeh u Dr.Airpeace ïa ki MLA phet seng.
U la ong “Ngi la ngiah ban peit ïa ka jingjyrsieh ha ka politik ha kane ka ri jong ngi, kumta ngim kwah shuh ba kine kin dangjia biang ha kane ka juk jong ngi ba mynta”.
U la kdew ruh ba kane ka Sorkar kaba synshar mynta ka Sorkar MDA-2, ka pynlynga ïa ki paidbah, bad kane ruh kan nym neh slem bad shen kan sa poi ka por ba kan sa jah noh bad shu sah tang ha ki sla jong ka histori, da kaba pynthikna ba kata, kadei ka jingkylla ha u snem 2028.
