Shillong, Risaw 20
U Samla Costom Marbaniang, na ka shnong Mawlangbah, West Khasi Hills District u la pynpaw ka jingsngewkhia haba ïadei bad ka kam ri jingri jong u.
Une u Samla u la pynpaw, ba kane ka jinghap shongdie hi ïa ki doh, ka la ktah jur ïa ka kam ri sniang jong u, namar ha ka jaka ban pynlut por ban ri bad sumar ïa ki sniang, u la hap ban iehnoh bad leit shong die kilo ha ïew.
“Kane ka jinglong jingman, ka pynduh jingkyrmen halor ka lawei jong ka kam ri jingri,” u la ong.
U Samla Costom u la ïathuh ba u la trei shitom ha ka kam ri sniang la palat 12 haduh 13 snem, hynrei namar ka jingbym ïaid ïew shuh ki sniang ba u ri, mynta u la hap ban shong die hi ïa ki sniang ha ïew tang ban ïoh pyndap ïa ki jingdonkam jong ka ïing ka sem.
U la pynpaw ruh ïa ka jingsngewkhia ba lada ka Sorkar Jylla kam patiaw ïa ki jingeh jong ki nongri jingri, kynthup ïa kiba ri blang, ri masi bad ri syiar, kan long kaba eh ban kyntiew ïa ka kam ri jingri ha ka Jylla.
U la ong ba ka jingai jinghikai (training) ïa ki briew kiba thmu ban rung sha ka kam ri jingri, kan ym seisoh lada ym don ka jingïarap bad ki lad jingïada kiba biang ïa ki nongri jingri.
“Kawei na ki jingkyrpad ba kongsan jong nga, ka long ba ka Sorkar Jylla, kadei ban pyrkhat ban khang noh ïa ka jingwanrah sniang nabar jylla, bad ban ai lad ïa ki nongri sniang hapoh ka Jylla, ba kin pynmih bad pynbiang hi ïa ka jingdonkam jong ka Jylla,” la ong u Samla Costom.
Katkum ka jingpynpaw jong u, lada ka Jylla ka ai lad ïa ki nongri sniang hapoh ka Jylla ban pynmih ïa ki sniang, kan ai mynsiem ïa ki nongri jingri bad kan plie lad ruh ïa kiwei pat ki briew ban sdang ïa kane ka kam.
U la ong ba lada ki nongri sniang hapoh ka Jylla ki ïoh ïa ka jingïarap, ka ïew kaba biang, ka Jylla kan lah ban pynmih hi ïa ki sniang kiba donkam, khnang ba kan duna noh ka jingshaniah ha ka jingwanrah sniang na kiwei pat ki Jylla.
U samla Costom u kyrpad ïa ka Sorkar Jylla ba kan peit lem ïa ka jingeh jong ki nongri jingri, ban thaw ïa ki lad jingïarap bad ban pynbiang ïa ka ïew kaba shngaiñ ïa ki mar rep bad ki jingri ba la pynmih da ki nongshong shnong ka Jylla.
Ka kam ri jingri ka lah ban long kawei na ki lad ban kyntiew ïa ka ïoh ka kot jong ki longïing ha ki shnong nongkyndong, hynrei khlem ka jingïarap, ka ïew kaba biang bad ka jingpynshlur na ka Sorkar, ki nongri jingri ki lah ban duh noh ïa ka mynsiem ban bteng ïa kane ka kam.
