Shillong, Risaw 20
U Bah A.L Hek uba dei u Nongïalam ka Bharatiya Janata Party (BJP) bad MLA ka Pynthorum-khrah ha ka sngi Ba-ar u la ong ba ka rai jong ki lai ngut ki MLA ka UDP ban pynïasoh noh sha ka National People’s Party (NPP) ka dei kaba la antad lypa la katto katne por.
Hadien ba ki phra ngut ki MLA ka UDP ki la pynïasoh sha ka BJP, kiwei ki lai ngut ki MLA ka UDP kiba la ryngkang sha ka NPP hadien ka jingïakynduh bad ai jingthoh sha u Lamphang ka ïingdorbar thawaiñ ki long u Bah Paul Lyngdoh, Bah Renikton Lyngdoh Tongkhar bad u Bah Nujorki Sungoh.
“Nga la ïohi ha ki lad pathai khubor ba ki lai ngut ki MLA ka UDP kila ïakynduh ïa u Lamphang bad rung noh sha ka NPP. Kane ka dei kaba la ïatip lypa naduh kaba sdang hi,” ong u Bah Hek haba kren bad ki nongthoh khubor.
U la ong, “Lait na u Bah Nujorki Sungoh ba na rilum Jaiñtia, ngim shym la tip eiei shaphang kane ka sienjam jong u, hynrei kiwei ki dei ruh ki paralok jong nga. Ngi la tip ba kin leit ïasoh sha ka NPP. Ka jingthmu jong ki ka long kaba shai na ki kam ba kila pynbeit ha la ki konstitwensi. Kam dei shuh kaba sngew pher ne ka khubor ka ban pynkyndit”.
Haba pynpaw ba kam don jingktah eiei ïa ka kynhun synrop MDA, u Bah Hek u la ong “Ngi dang don beit ha ka MDA. Kito kiba leit ïasoh NPP hynnin ka sngi ruh ki dei hi ki paralok ha ka MDA hi bad kito kiba ïasoh BJP na ka UDP ruh ki dei ki paralok ha ka MDA. Kam don jingpher eiei ïa ka MDA”.
